2024 T20 කාන්තා ලෝක කුසලාන තරඟ කාලසටහන ප්‍රකාශයට පත් කෙරේ
එක්සත් අරාබි එමීර් රාජ්‍යයේ පැවැත්වීමට නියමිත 2024 T20 කාන්තා ලෝක කුසලාන ක්‍රිකට් තරගාවලියට අදාළ තරග කාලසටහන ICCය විසින් ඊයේ (26) පස්වරුවේ ප්‍රකාශයට පත් කර තිබේ.
මෙම තරගාවලිය සඳහා කණ්ඩායම් 10ක් ක්‍රීඩා කරන අතර මෙහි මූලික වටය තරග A හා B ලෙස කාණ්ඩ දෙකකින් සමන්විතය.
ඒ අනුව, A කාණ්ඩයෙන් ඕස්ට්‍රේලියාව, ඉන්දියාව, නවසීලන්තය, පාකිස්ථානය සහ ශ්‍රී ලංකාව තරග වැදීමට නියමිතව ඇත.
එමෙන්ම B කාණ්ඩයට දකුණු අප්‍රිකාව, එංගලන්තය, බටහිර ඉන්දීය කොදෙව්, බංග්ලාදේශය හා ස්කොට්ලන්තය ඇතුළත් වේ.
2024 T20 කාන්තා ලෝක කුසලාන ක්‍රිකට් තරගාවලිය ඔක්තෝබර් මස 03 වනදා ආරම්භ වීමට නියමිතය.
ශ්‍රී ලංකාව සහ ස්කොට්ලන්තය මෙම තරගාවලියට ඍජුව සුදුසුකම් ලබාගැනීමට නොහැකි වූ කණ්ඩායම් දෙක වන අතර, ඔවුන් මෙම වසර ආරම්භයේදී අබුඩාබිහිදී පැවති මෙම ලෝක කුසලාන තරගාවලියට සුදුසුකම් ලැබීමේ තරගාවලිය ජයගනිමින් එම අවස්ථාව උදාකරගෙන සිටී.
ශ්‍රී ලංකාව එහි ශූරතාව දිනාගැනීමට සමත් විය.
කාන්තා විස්සයි 20 ලෝක කුසලානයේ 9 වන අදියර ලෙසින් මෙය බංග්ලාදේශයේ පැවැත්වීමට සැලසුම්කර තිබුණි.
කෙසේ නමුත් ඉකුත් දින කිහිපයේදී බංග්ලාදේශය තුළ හටගත් දේශපාලන අරාජිකත්වය හේතුවෙන් එහි සත්කාකරකත්වය බංග්ලාදේශයෙන් ඉවත්කර එක්සත් අරාබි එමීර් රාජ්‍යය වෙත රැගනෙ යාමට ICCය කටයුතු කළේය.
