අපරාධ වලට සම්බන්ධ පොලිස් ලොක්කන් සොයා පොලිස්පතිගෙන් යාන්ත්‍රණයක්
සංවිධානාත්මක අපරාධ වලට සම්බන්ධ ඉහළ පෙළේ පොලිස් නිලධාරීන් හඳුනාගැනීම සඳහා පොලිස් දෙපාර්තමේන්තුව විශේෂ යාන්ත්‍රණයක් ආරම්භ කර ඇති බව පොලිස්පති දේශබන්දු තෙන්නකෝන් මහතා පවසයි.
අපරාධ පරීක්ෂණ දෙපාර්තමේන්තුවේ (CID) නිලධාරීන් ඇතුළු සංවිධානාත්මක අපරාධ වලට සම්බන්ධ ජ්‍යෙෂ්ඨ පොලිස් නිලධාරීන් සොයාබැලීමේ නව වැඩපිළිවෙළ මේ වන විට ක්‍රියාත්මක වන අතර, ඊට සම්බන්ධ නිලධාරීන්ට එරෙහිව පියවර ගැනීමට පියවර ගෙන ඇති බව පොලිස්පතිවරයා ප්‍රකාශ කරයි.
පුවත්පතක් වෙත අදහස් දක්වමින් පොලිස්පති තෙන්නකෝන් මහතා පවසා ඇත්තේ, එවැනි සබඳතා ඇති බවට හඳුනාගත් නිලධාරීන් කිහිපදෙනකු මේ වන විටත් වෙනත් අංශ වෙත ස්ථාන මාරු කර ඇති බවයි.
විශේෂයෙන්ම ජ්‍යෙෂ්ඨ නිලධාරීන්ගේ මෙවැනි විෂමාචාර ක්‍රියා නිසා පොලිස් දෙපාර්තමේන්තුව විසින් දියත්කර ඇති මත්ද්‍රව්‍ය හා අපරාධ මර්දන ක්‍රියාදාමයට බාධාවක් විය හැකි බැවින්, එවැනි නිලධාරීන්ට එරෙහිව දැඩි ක්‍රියාමාර්ග ගන්නා බවද ඔහු අවධාරණය කර ඇත.
එවැනි සිදුවීම් සහ පුද්ගලයන් සම්බන්ධයෙන් පරීක්ෂණ ගණනාවක් තවමත් සිදුවෙමින් පවතින බව පවසන පොලිස්පතිවරයා, පසුගිය මාස කිහිපය තුළ අපරාධ පරීක්ෂණ දෙපාර්තමේන්තුවේ නිලධාරීන් කිහිපදෙනකු එම දෙපාර්තමේන්තුවෙන් ඉවත් කළ බවත්, අනෙක් අය වෙනත් ස්ථාන වලට මාරු කළ බවත් සඳහන් කර තිබේ.
ආන්දෝලනාත්මක, සංවිධානාත්මක අපරාධකරුවෙකු වන නදුන් චින්තක නොහොත් හරක් කටාට සම්බන්ධ බවට චෝදනා එල්ල වී සිටින අපරාධ පරීක්ෂණ දෙපාර්තමේන්තුවේ උසස් නිලධාරීන් ඇතුළු පොලිස් නිලධාරීන් රැසකට ස්ථාන මාරුවීම් ලබාදීමට නියමිත බව මීට පෙර වාර්තා විය.
එම වාර්තාවලට අනුව, ජ්‍යෙෂ්ඨ පොලිස් අධිකාරීවරයකු යැයි සැක කරන එක් නිලධාරියකු සහ තවත් CID නිලධාරීන් දුසිමක් පමණ හරක් කටා සමඟ ඇති බව කියන සම්බන්ධතා සම්බන්ධයෙන් පොලිස් දෙපාර්තමේන්තුව සමීපව විමර්ශනය කරමින් සිටී.