අල් ජසීරා නාලිකාවට රනිල් නෑ කියපු බටලන්ද වාර්තාව ලංකාවේ හිටපු BBC වර්තාකාරිනිය එළියට දමයි
ශ්‍රී ලංකාවේ හිටපු බීබීසී වාර්තාකාරිනියක් වන Frances Harrison, හිටපු ශ්‍රී ලංකා අගමැති රනිල් වික්‍රමසිංහ සමඟ අල් ජසීරා සම්මුඛ සාකච්ඡාවේ ප්‍රශ්න ඇසීමට සිටි සාමාජිකාවක ලෙස කටයුතු කළ අතර, සාකච්ඡාව අතරතුර රනිල් වික්‍රමසිංහ මහතා ප්‍රතික්ෂේප කළ පැරණි ලේඛනයක් වන බටලන්ද කොමිෂන් සභා වාර්තාව X සටහනක් තබමින් ඇය අන්තර්ජාලයට මුදාහැර තිබෙනවා.
අදාළ සංවාදයේදී Al Jazeera මාධ්‍යවේදියා විසින් මෙම වාර්තාව උපුටා දක්වමින් ප්‍රශ්න කිරීමේදී හිටපු ජනාධිපති රනිල් වික්‍රමසිංහ එවැනි වාර්තාවක් නොපවතින බවට දැඩිව ප්‍රකාශ කළා.
එවිට Frances Harrison විසින් අදාළ වාර්තාවේ ඇය සතුව තිබූ පිටපතක් ඉදිපත් කිරීමට කටයුතු කරනු ලැබුවා.
සම්මුඛ සාකච්ඡාව අතරතුර, බටලන්ද නිවාස සංකීර්ණයේ නීතිවිරෝධී රඳවා තබාගැනීම, වධහිංසා පැමිණවීම සහ ඝාතන පිළිබඳව තමා දැන සිටි බවට රජය විසින් පත්කළ බටලන්ද කොමිසම විසින් කරන ලද චෝදනා රනිල් වික්‍රමසිංහ මහතා ප්‍රතික්ෂේප කළේය.
“මම ඒ සියලු චෝදනා ප්‍රතික්ෂේප කරනවා,” යැයි ඔහු ආවේගශීලීව සඳහන් කළේය.
එම ප්‍රශ්නය ඇසීමේදී, මුල් අවස්ථාවේ රනිල් වික්‍රමසිංහ මහතා එවැනි වාර්තාවක් නොපවතින බව ප්‍රකාශ කළ නමුත් අල් ජසීරා ආයතනය එහි පිටපතක් ඉදිරිපත් කර තිබුණි.
ඉන් පසුව, රනිල් වික්‍රමසිංහ මහතා පැවසුවේ එය කිසි විටෙකත් පාර්ලිමේන්තුවේ සභාගත කර නොමැති බැවින් එය නිල ලේඛනයක් නොවන බවයි.
“ඒක පාර්ලිමේන්තුවේ සභාගත කර නැහැ. එයින් මට විරුද්ධව කිසිවක් සොයාගැනීමට නොහැකියි” යැයි ඔහු කියා සිටියේය.
කෙසේ වෙතත් බටලන්ද කොමිෂන් සභා වාර්තාව අන්තර්ජාලයට මුදා හරිමින් ඇය පවසා ඇත්තේ බටලන්ද වධකාගාරය ගැන ජනාධිපති කොමිශන් සභා වාර්තාවක් පවතින බව හිටපු ජනාධිපති රනිල් වික්‍රමසිංහ මහතා ප්‍රතික්ෂේප කිරීමට උත්සාහ කරමින් සිටින බවයි.
