ලෝක ආර්ථික සමුළුව අද ස්විට්සර්ලන්තයේ දී
ලෝක ආර්ථික සමුළුව අද (15) ස්විට්සර්ලන්තයේ ඩාවෝස් නුවරදී පැවැත්වේ.
එම සමුළුවට එක්වීම සඳහා ජනාධිපති රනිල් වික්‍රමසිංහ මහතා පෙරේදා (13) දිවයිනෙන් පිටත්ව ගියේ ය.
මෙම සමුළුවට සමගාමීව අද ආරම්භ වන ලෝක ආර්ථික සංසදයේ වාර්ෂික රැස්වීමට ද ජනාධිපතිවරයා සහභාගීවීමට නියමිතයි.
ලෝක ආර්ථික සංසදය යනු දේශපාලන, ආර්ථික, සමාජීය සහ පාරිසරික න්‍යායපත්‍ර හැඩගැස්වීම සඳහා වසර ආරම්භයේදී ලෝකයේ ප්‍රධාන රටවල් සහභාගී වන රැස්වීමකි.
ජාත්‍යන්තර සංවිධාන, ගෝලීය සමාගම්, සිවිල් සමාජය සහ අධ්‍යයන ආයතන ද මේ සඳහා සහභගී වනු ඇති.
මෙහිදී ජනපතිවරයා ස්විට්සර්ලන්ත – ආසියානු වාණිජ මණ්ඩලය විසින් සංවිධාන කරනු ලබන ග්‍රීන් ටෙක් සංසදයේ ප්‍රධාන දේශනය ද පැවැත්වීමට නියමිතයි.
“බලශක්ති සුරක්ෂිත ශ්‍රී ලංකාවක් කරා මග පෑදීම” එහි තේමාව වේ.
මේ අතර ශ්‍රී ලංකා ආයෝජන මණ්ඩලය විසින් ස්විට්සර්ලන්ත ආසියානු වාණිජ මණ්ඩලය සමග එක්ව සංවිධානය කරනු ලබන ව්‍යාපාරික වට මේස සමුළුවට ද ජනාධිපතිතුමා සහභාගි වීමට නියමිත වේ.