ඉන්දීය මුදල් අමාත්‍යවරිය අද දිවයිනට
ඉන්දීය මුදල් අමාත්‍ය නිර්මලා සීතාරාමන් තෙදින නිල සංචාරයක් සඳහා අද (01) දිවයිනට පැමිණීමට නියමිතව තිබේ.
ඉන්දීය විදේශ කටයුතු අමාත්‍යංශය සඳහන් කළේ, කොළඹදී පැවැත්වීමට නියමිත ඉන්දු ශ්‍රී ලංකා ව්‍යාපාරික සමුළුවකට ඉන්දීය මුදල් අමාත්‍යවරිය එක්වීමට නියමිත බවය.
හෙට (02) දින පැවැත්වීමට නියමිත එහි ප්‍රධාන දේශනය නිර්මලා සිතාරාමන් විසින් සිදු කරනු ලැබීමට නියමිත බව ද එම අමාත්‍යංශය පැවසීය.
අනතුරුව ඇය ත්‍රිකුණාමල‍යේ පිහිටි තෙල් ටැංකි සංකීරණයේ නිරීක්ෂණ චාරිකාවකට එක්වීමට නියමිතව තිබේ.
ඇය යාපනයේ සහ මහනුවර යන ප්‍රදේශවල ද සංචාරයන්හි නිරත වනු ඇත.
මෙම සංචාරයේදී ජනාධිපති රනිල් වික්‍රමසිංහ, අග්‍රාමාත්‍ය දිනේෂ් ගුණවර්ධන සහ ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් ඇතුළු දේශපාලන නියෝජිතයින් කිහිප දෙනෙකු සමග නිර්මලා සීතාරාමන් සාකච්ඡා පැවැත්වීමට නියමිත බව ඉන්දීය විදේශ කටයුතු අමාත්‍යංශය පැවසීය.
මෙරට ආගමික ස්ථානවල සූර්ය බලපද්ධති සවිකිරීම සඳහා වූ අවබෝධතා ගිවිසුමක් ශ්‍රී ලංකා රජය සමග අත්සන් කිරීමේ අවස්ථාවට ද ඇය එක් වීමට නියමිත ය.