යෝෂිත රාජපක්ෂ සමග පැමිණි පිරිසක් රාත්‍රී සමාජ ශාලාවක ආරක්ෂකයෙක්ට පහරදීලා
කොළඹ 02, උද්‍යාන පාරේ (පාක් වීදියේ) පිහිටි රාත්‍රී සමාජ ශාලාවක ආරක්ෂකයෙකුට යෝෂිත රාජපක්ෂ සමඟ පැමිණි පිරිසක් විසින් පහර දී ඇති බව පොලීසිය පවසයි.
මෙම පහරදීම හේතුවෙන් එම ආරක්ෂක නිලධාරියා තුවාල ලබා ඇති අතර, දැනට ඔහු කොළඹ පිහිටි පෞද්ගලික රෝහලක ප්‍රතිකාර ලබමින් සිටී.
පොලිස් ප්‍රකාශකයෙකු සඳහන් කළේ, හිටපු ජනාධිපති මහින්ද රාජපක්ෂගේ පුත්‍රයෙකු වන යෝෂිත රාජපක්ෂ, ඔහුගේ බිරිඳ නිතීෂා ජයසේකර සහ තවත් පුද්ගලයන් අට දෙනෙකු පෙරේදා අලුයම එම රාත්‍රී සමාජ ශාලාවට පැමිණ ඇති බවයි.
එහිදී සමාජ ශාලාව තුළ රැඳී සිටීම සඳහා අවශ්‍ය වන හඳුනාගැනීමේ අත්පළඳනා පැළඳීම අනිවාර්ය බව එහි ආරක්ෂක නිලධාරීන් විසින් දැනුම් දී තිබේ.
මෙම පිරිසේ සිටි එක් අයෙකුට එවැනි අත්පළඳනාවක් නොතිබීම හේතුවෙන් ආරක්ෂක නිලධාරියා විසින් කරන ලද විමසීමක් අතරතුර බහින්බස්වීමක් ඇති වී ඇත.
පොලිස් වාර්තා අනුව, මෙම ආරවුල ඇති වූ අවස්ථාවේදී යෝෂිත රාජපක්ෂ සහ ඔහුගේ බිරිඳ එම ස්ථානයෙන් ඉවත්ව ගොස් ඇති නමුත්, ඔවුන් සමඟ පැමිණි අනෙක් පුද්ගලයන් අටදෙනා එම ආරක්ෂක නිලධාරියාට පහර දී ඇති බව සඳහන් වේ.
මෙම පහරදීම් සිද්ධිය සම්බන්ධයෙන් රාත්‍රී සමාජ ශාලාවේ හිමිකාරිනිය විසින් කොම්පඤ්ඤ වීදිය පොලිසියේ පැමිණිල්ලක් ගොනු කර ඇති බව පොලිස් ප්‍රකාශකයා තහවුරු කළේය.
ඒ අනුව, ඊයේ උදෑසන කොම්පඤ්ඤ වීදිය පොලිසිය විසින් සිද්ධිය වූ ස්ථානයේ පොලිස් පරීක්ෂණයක් පවත්වා ඇති අතර, ඉදිරි විමර්ශන කටයුතු දැනට සිදුකෙරෙමින් පවතී.
පොලිසිය මාධ්‍ය වෙත නිකුත් කළ නිවේදනයක සඳහන් වන්නේ, මෙම සිද්ධිය පිළිබඳ විමර්ශන කටයුතු ඉතා සැලකිල්ලෙන් යුතුව සිදු කෙරෙන බවත්, ඒ සඳහා විශේෂ පොලිස් කණ්ඩායමක් පත් කර ඇති බවත්ය.
කොම්පඤ්ඤ වීදිය පොලිසියේ ජ්‍යෙෂ්ඨ නිලධාරියෙකු සඳහන් කළේ, මෙම සිද්ධියට සම්බන්ධ සැකකරුවන් හඳුනාගැනීමට පියවර ගෙන ඇති බවත්, ඔවුන්ට එරෙහිව නීතිමය ක්‍රියාමාර්ග ගැනීමට සූදානම් බවත්ය.
