දුම්රිය රියදුරන් බඳවා ගන්න අයදුම් පත් කැඳවේ
ශ්‍රී ලංකා දුම්රිය දෙපාර්තමේන්තුවේ පවතින දුම්රිය රියදුරු තනතුරේ පුරප්පාඩු පිරවීම සදහා අයදුම්පත් කැඳවා ඇතැයි ලොකොමොටිව් ඔපරේටින් ඉංජීනියස් රියදුරු සංගමයේ හිටපු ලේකම් එස්.ආර් .සී .එම්.සේනානායක මහතා පවසයි.
අපොස (උසස් පෙළ) විභාගයෙන් සංයුක්ත ගණිතය, භෞතික විද්‍යාව හා තවත් එක් විද්‍යා විෂයයක් ඇතුළු සියලු විෂයයන්ගෙන් එකවර සමත්වි තිබීම, භාෂාව හෝ සාහිත්‍යය, ගණිතය සහ විද්‍යාව’ඇතුළු විෂයයන් හතර කට සම්මාන සාමාර්ථ සහිතව අපොස ( සාමාන්‍ය පෙළ විභාගය) එකවර විෂයයන් හයකින් සමත් පිරිමි අයදුම්කරුවන්ට මෙම රියදුරු තනතුරු සදහා අයදුම් කළ හැකිය.
වෘත්තිය සුදුසුකම් වශයෙන් තෘතීයක හා වෘත්තීය අධ්‍යාපන කොමිෂන් සභාව පිළිගනු ලබන ඉංජීනේරු ඩිප්ලෝමාව හදාරා තිබීම හා විවෘත විශ්ව විද්‍යාලය විසින් ලබාදෙන තාක්ෂණික ඩිප්ලෝමාව දක්වා හදාරා තිබීම.
දුම්රිය රියදුරන් බදවා ගැනීම සම්බන්ධ වැඩි විස්තර 2025 පෙබරවාරි 28 වන දින රජයේ ගැසට් පත්‍රයේ සදහන් වන බව දුම්රිය රියදුරු සංගමයේ හිටපු ලේකම් සේනානායක මහතා වැඩි දුරටත් සඳහන් කළේය.
බොහෝ කාලයක සිට දුම්රිය රියදුරු තනතුරේ පුරප්පාඩු 228 ක් පමණ පවතින බව දුම්රිය රියදුරු සංගමය පවසයි.
දුම්රිය රියදුරන් 458 ක් පමණ සිටිය යුතු නමුත් මේ වනවිට සිටින්නේ රියදුරන්, 220 ක් පමණ වන බව එම සංගමය වැඩි දුරටත් සඳහන් කරයි.
