web hit counter
ශ්‍රී ලංකාවට සුපිරි ජයක්

ශ්‍රී ලංකාවට සුපිරි ජයක්

ICC ලෝක කුසලාන එක්දින ක්‍රිකට් තරගාවලියට සුදුසුකම් ලබා ගැනීමේ තරගාවලියේ ශ්‍රී ලංකා කණ්ඩායම හා අයර්ලන්ත කණ්ඩායම අතර අද (25) පැවති තරගයෙන් සුපිරි ජයග්‍රහණයක් ලබා ගැනීමට ශ්‍රී ලංකා කණ්ඩායම සමත් විය.

ලකුණු 326ක ජයග්‍රාහි ඉලක්කයක් හඹා ගිය අයර්ලන්තය මීට මොහොතකට පෙර පන්දුවාර 31 කදී සියලුදෙනා දැවි රැස්කරගනු ලැබුවේ ලකුණු 192ක් පමණි.

ඒ අනුව ලකුණු 133ක සුපිරි ජයක් වාර්තා කිරීමට ශ්‍රී ලංකා කණ්ඩායම සමත් විය.

පන්දු යැවීමේදී ශ්‍රී ලංකාව වෙනුවෙන් වනිඳු හසරංග කඩුලු 5ක් සහ මහීෂ් තීක්ෂණ කදුළු 2ක් ලබා ගත්තේය.

තරග දෙකකදී පිට පිට කඩුලු 5ක් දවා ගනිමින් වනිඳු හසරංග වකා යුනිස් සතු වාර්තාවක් සම කිරීමට ද මෙහිදී සමත් විය.

බුලවායෝ ක්‍රීඩාංගණයේදී කාසියේ වාසිය දිනු අයර්ලන්ත නායකයා පළමුව පන්දුවට පහර දීමට ශ්‍රී ලංකා කණ්ඩායමට ආරාධනා කළේය.

ශ්‍රී ලංකා පිලේ ආරම්භක කඩුල්ලේ සබඳතාව ලකුණු 48කට සීමා කරමින් පැතුම් නිස්සංක ලකුණු 20කට දැවීගිය අතර, කුසල් මෙන්ඩිස් ලකුණු නොලබා දැවි ගියේය.

අනතුරුව දිමුත් සමඟ පිටියට එක්වූ සදීර සමරවික්‍රම තුන්වන කඩුල්ල වෙනුවෙන් 168ක සබඳතාවක් ගොඩනැගුවේ ශ්‍රී ලංකා ලකුණු පුවරුව ශක්තිමත් කරමිනි.

දිමුත් කරුණාරත්න සිය මංගල එක්දින ශතකය සමඟින් ලකුණු 103ක් අද රැස්කළේය.

සදීර සමරවික්‍රම ලකුණු 82යි.

දිමුත්ගේ දැවී යාමෙන් අනතුරුව ශ්‍රී ලංකා පිලේ කඩුලු 6ක් ලකුණු 90ක් තුළදී දැවි යාමත් සමඟ පන්දුවාර 49යි පන්දු 5කදී ශ්‍රී ලංකා ලකුණු පුවරුව, සියලුදෙනා දැවි ලකුණු 325ක් ලෙස සටහන් විය.

ධනංජය ද සිල්වා නොදැවි ලකුණු 42ක් රැස්කළ අතර චරිත් අසලංක ලකුණු 38යි.

Share This

COMMENTS

Wordpress (0)
Disqus (0 )