සේරුනුවර බිහිසුණු බස් රථ අනතුරක් – 14ක් රෝහලට
කාත්තන්කුඩියේ සිට කොළඹ දෙසට ධාවනය වූ සුඛෝපභෝගී මගී ප්‍රවාහන බස් රථයක් සේරුනුවර කන්තලේ මාර්ගයේ, සේරුනුවර යුද හමුදා කඳවුර ඉදිරිපිටදී අනතුරකට ලක්ව තිබේ.
පවතින අධික වර්ෂාව හේතුවෙන් බස් රථය මාර්ගයෙන් ඉවතට පැන මාර්ගය අයිනේ තිබූ ගසක ගැටී මාර්ගයෙන් ඉවතට පෙරළී අනතුර සිදුව ඇති බවයි, පොලිසිය පැවසුවේ.
ඊයේ (19) රාත්‍රී 12.15 ට පමණ මෙම අනතුර සිදුව ඇති අතර එම අවස්ථාවේ බස් රථය තුළ මගීන් 49ක් පමණ සිට ඇති බවයි, වාර්තා වෙන්නේ.
අනතුරින් රථයේ රියදුරු සහ රිය සහයක සමඟින් මඟීන් 14 දෙනෙකු ප්‍රතිකාර සඳහා සේරුනුවර රෝහලට ඇතුළත් කර තිබේ.
අනතුරුව රියදුරු සහ මඟීන් 09 දෙනෙකු වැඩිදුර ප්‍රතිකාර සඳහා ත්‍රීකුණාමලය රෝහල වෙත මාරුකර යවා ඇතිබව වාර්තා වේ.
අපරීක්ෂාකාරී රිය ධාවනය අනතුරට හේතු වී ඇතැයි, දැනට කරන ලද විමර්ශන වලදී අනාවරණ වී ඇති බව පොලිසිය පවසයි.
