පෙම්වතා ඇතුළු සිසුන් හත් දෙනෙක් පාසල් දැරියක අපයෝජනය කරලා
පහලොස් හැවිරිදි බාල වයස්කාර පාසැල් දැරියක සමූහ දූෂණයට ලක් කිරීම සම්බන්ධයෙන් එම බාල වයස්කාර දැරියගේ පෙම්වතා බව කියන පාසල් සිසුවා සහ තවත් පාසල් සිසුන් පස්දෙනකු ඇතුළු හත් දෙනකු අත්අඩංගුවට ගත් බව හෝමාගම මූලස්ථාන පොලිසිය පවසයි.
එම පාසල් දැරියගේ මාපියන් දැරිය සමඟ පැමිණ පොලිසියට සිදු කළ පැමිණිල්ලක් මත විමර්ශන කටයුතු ආරම්භ කර පැය කිහිපයක් ඇතුළත සැකකරුවන් හත් දෙනා අත්අඩංගුවට ගැනීමට කටයුතු කළ බවත්, සමූහ දූෂණයට ලක් වූ බව කියන පහළොස් හැවිරිදි පාසල් දැරිය හෝමාගම මූලික රෝහලට ඇතුළත් කර වෛද්‍ය පරීක්‍ෂණයකට ලක් කිරීමට කටයුතු කළ බවත් පොලිසිය පවසයි.
එලෙස සමූහ දුෂණයට ලක් වූ පාසල් සිසුවිය උපකාරක පන්තියකට සහභාගී වන බව නිවසට පවසා තම පෙම්වතා බව කියන පාසල් සිසුවා හමුවීම සඳහා ගොස් ඇති බවත්, එම අවස්ථාවේදී සැකකාර පෙම්වතා විසින් දැරියද රැගෙන ඔහුගේ මිතුරකු සිටින හෝමගම මාගම්මන ප්‍රදේශයේ නිවසකට ගොස් එම නිවසේදී දැරිය දූෂණයට ලක් කර ඇති බවත් පැවසේ.
ඒ අනුව උදෑසන නමයත් සවස තුනත් අතර පැය හයක කාලයක් ඇතුළත හෝමාගම මාගම්මන ප්‍රදේශයේ නිවාස තුනකට රැගෙන ගොස් වින්දිත දැරිය සැකකාර පාසල් පෙම්වතා ඇතුළු ඔහුගේ මිතුරන් විසින් වරින්වර බරපතල ලිංගික අපයෝජනය ලක් කර ඇති බවට අනාවරණය වූ බවද පොලිසිය පවසයි.
