ගුරු – විදුහල්පති උද්ඝෝෂණයක්
වැටුප් විෂමතාවය ඉවත් කිරීම ඇතුළු ඉල්ලීම් කිහිපයක් මුල්කර ගනිමින් විරෝධතා ව්‍යාපාරයක් ආරම්භ කිරීමට ගුරු – විදුහල්පති වෘත්තීය සමිති තීරණය කර තිබේ.
එහි පළමු අදියර ලෙස අද (20) පස්වරුවේ මහනුවර නගරයේ උද්ඝෝෂණ ව්‍යාපාරයක් පැවැත්වීමට නියමිත බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් මහතා සඳහන් කළේය.
“ගුරු සහ විදුහල්පතිවරුන්ගේ උසස්වීම් සම්බන්ධයෙන් කිසිදු වැඩපිළිවෙළක් නෑ. ඔවුන් බරපතළ අර්බුදයකට ලක්වෙලා ඉන්නවා. ගුරු සේවයෙන් විදුහල්පති සේවයට ආවාම පඩි අඩුවෙනවා. අධ්‍යාපන පද්ධතියේ සමස්ත ප්‍රශ්න සම්බන්ධයෙන් කිසිදු අවදානයක් අධ්‍යාපන බලධාරීන් තුළ නෑ. හැමදාම සාකච්ඡා විතරයි. ඒ නිසා අපි ගුරු වැටුප් විෂමතා ඉවත් කිරීම පද්ධතියේ ඇතුළු ප්‍රශ්න විසඳන්න කියලා බලකරලා දැවැන්ත උද්ඝෝෂණ මාලාවක් අද දවසේ ආරම්භ කරනවා. එහි පළවෙනි උද්ඝෝෂණය අපි මහනුවරින් ආරම්භ කරනවා පස්වරු 2ට. අපි පැහැදිලිවම කියනවා ආණ්ඩුවට වහාම අපි ලබාදෙන පණිවුඩය තේරුම් ගන්න ඕනේ. ගුරු විදුහල්පති සන්ධානය යටතේ මේකෙදී ගුරුවරු, විදුහල්පතිවරු, ගුරු උපදේශකවරු, පිරිවෙන් ගුරුවරු සියලු පාර්ශව ඒකාබද්ධව කරන උද්ඝෝෂණයක් අපි මේ ආරම්භ කරන්නේ ආණ්ඩුවට පණිවුඩයක් දෙන්න. වහාම ගැටලුවලට විසඳුම් ලබාදෙන්න ඕනේ එහෙම නොවුනොත් ඉදිරියේදී විවිධ වෘත්තිය ක්‍රියාමර්ගවලට යොමුවෙනවා.”