මහනුවර – මහියංගන පාර සම්පූර්ණයෙන්ම විවෘත කරයි
පස් කඳු කඩාවැටීම් සහ ගල් පෙරළීමේ අවධානම මත රාත්‍රී කාලයේදී තාවකාලිකව වසා දැමුණ මහනුවර මහියංගන මාර්ගය වාහන ගමනාගමනය සඳහා ඊයේ (27) රාත්‍රියේ සිට නැවත විවෘත කළ බව මහනුවර දිස්ත්‍රික් ලේකම් ඉන්දික උඩවත්ත මහතා පැවසීය.
ඉකුත් 21 දින සිට සෑම දිනකම පස්වරු 6.00 සිට පසුදින උදෑසන 6.00 දක්වා රාත්‍රී කාලය සම්පූර්ණයෙන් වසා තිබුණු මෙම මාර්ගය ජාතික ගොඩනැගිලි පර්යේෂණ සංවිධානය ලබාදුන් නිර්දේශ මත නැවත විවෘත කිරීමට පියවර ගත් බවද දිස්ත්‍රික් ලේකම්වරයා පවසයි.
මාර්ගයට පෙරළී තිබුණු ගල් සහ තවදුරටත් අවදානම් තත්ත්වයේ පැවැති ගල් මේ වනවිට ඉවත්කොට ඇති අතර මාර්ගයේ තත්ත්වය පිළිබඳ ජාතික ගොඩනැගිලි පර්යේෂණ සංවිධානය අධ්‍යයනය කොට වාර්තාවක් ලබාදීමට නියමිතය.
