ගුරු පත්වීම් දීමේ උත්සවයට අරලියගහ මන්දිරයට ගිය තරුණියගේ අත්බෑගයේ හිස් උණ්ඩ
අරලියගහ මන්දිර පරිශ්‍රයේ පැවැති බස්නාහිර පළාතේ ගුරු පත්වීම් ලබා දීමේ උත්සවයට පැමිණි පාසල් ක්‍රීඩා තරඟ විනිසුරුවරියකගේ අත් බෑගයේ තිබී හිස් උණ්ඩ තුනක් සොයා ගැනීමෙන් පසු එම තැනැත්තිය සැකපිට අත්අඩංගුවට ගත් බව කොල්ලුපිටිය පොලීසිය පවසයි.
අත්අඩංගුවට ගත් සැකකාරිය 26 හැවිරිදි වියේ පසු වන තැනැත්තියකි.
ගුරු පත්වීම් ලබා ගැනීම සඳහා අලියගහ මන්දිරය පරිශ්‍රයට පැමිණෙන කාන්තාවන් පරික්ෂා කිරීමේ කටයුතුවල යොදවා සිටි පොලිස් කොස්තාපල්වරියක් මෙම තැනැත්තියගේ අත්බෑගය පරීක්ෂාකර බැලීමේදී මෙම හිස් උණ්ඩ තිබී සොයාගෙන ඇතැයි ප්‍රදේශයේ උසස් පොලිස් නිලධාරියෙක් පැවැසීය.
මෙම සැකකාරිය පිළියන්දල මධ්‍ය මහා විද්‍යාලයේ පැවති උත්සවයක තරග තීරකවරයකු ලෙස කටයුතු කළ අවස්ථාවේ තරඟ ආරම්භ කිරීමට සංඥාව ලබාදීම සඳහා භාවිතා කළ අවියේ උණ්ඩ බිම වැටුණු පසු අහුලාගෙන අත් බෑගයේ දමාගෙන සිට ඇති බව පරීක්ෂණවලින් හෙළි වූ බව පොලීසිය කියයි.
එම ක්‍රීඩා උත්සව සඳහා ආරම්භක සංඥා ලබා දීමට භාවිතා කරන ලද අවිය පොලිස් කේෂ්ත්‍ර බලකා
මූලස්ථානයෙන් නීත්‍යානුකූල ආකාරයට ලබාගෙන ඇති බවද පරීක්ෂණවලින් අනාවරණය විණි යැයි එම උසස් පොලිස් නිලධාරියා කීවේය.
මේ සඳහා භාවිතා කරන ලද උණ්ඩ මලල ක්‍රීඩා සංගමය විසින් සපයා ඇති බවද පොලිසිය කියයි.
කොල්ලුපිටිය පොලිසිය මේ සම්බන්ධයෙන් වැඩිදුර පරීක්ෂණ පවත්වාගෙන යයි.