ඉන්ධන බෙදාහැරීමේ කටයුතු ගැන දැනුවත් කිරීමක්
ඉන්ධන බෙදාහැරීමේ කටයුතු කිසිදු ගැටලුවකින් තොරව සිදුවන බව ලංකා ඛනිජ තෙල් බෙදුම්කරුවන්ගේ සංගමය පවසනවා.
කොලොන්නාව තොග ගබඩා පර්යන්තයෙන් ඉන්ධන ලබාගැනීමට ද සියලුම බවුසර් රථ කටයුතු කර ඇති බව ඛනිජ තෙල් නීතිගත සංස්ථාවේ සභාපති ආනන්ද රාජකරුණා මහතා පවසනවා.
මේ අතර ඉන්ධන පිරවුම්හලක් අසල පෝලිම් දැකගත නොහැකි අතර සාමාන්‍ය පරිදි ඉන්ධන නිකුත් කිරීම් සිදු වනවා.
අද දිනය ඉරිදා දිනයක් වුවත් බවුසර් රථ ඉන්ධන ලබා ගැනීමට පැමිණ ඇති අතර ඉන්ධන රැගත් බවුසර් එම පරිශ්‍රයෙන් පිටව යන ආකාරය ද දැකගත හැකිවුණා.
ඒ අනුව තෙල් බෙදා හැරීම කිසිදු ගැටලුවකින් තොරව සිදු වන බවයි කොලොන්නාව තොග ගබඩා පර්යන්තය සඳහන් කරන්නේ.
ඉන්ධන බෙදාහරින්නන් ලබාගන්නා සියයට තුනක නීත්‍යානුකූල නොවන වට්ටම් මුදල අහෝසි කරන ලෙස අධිකරණය මගින් තීන්දුවක් ලබාදී තිබුණ ද එම තීන්දුව මේ වන තෙක් ක්‍රියාත්මක කිරීමට කිසිදු රජයක් කටයුතු කර තිබුණේ නැහැ.
ඒ අනුව අදාළ අධිකරණ නියෝගය ක්‍රියාත්මක කිරීමට වත්මන් රජය කටයුතු කළා.
එමෙන්ම මෙම සියයට තුනක මට්ටම් මුදල නව මිල සූත්‍රයක් මගින් ගෙවීමට මේ වන විට සැළසුම් සකස් කර තිබෙනවා.
මේ අතර ලංකා ඛනිජ තෙල් බෙදුම්කරුවන්ගේ සංගමය ද පවසන්නේ ඉන්ධන බෙදා හැරීමේ කටයුතු කිසිදු ගැටලුවකින් තොරව සිදුවන බවයි.
