එක් කෝටි හැත්තෑ අට ලක්ෂයක මත්පෙති මධ්‍යම තැපැල් හුවමාරුවේ
රුපියල් එක් කෝටි හැත්තෑ අට ලක්ෂයක් වටිනා මත්ද්‍රව්‍ය තොගයක්, ඉකුත් සති දෙකක කාළය තුළ කොළඹ මධ්‍යම තැපැල් හුවමාරුව තුළ භාර ගැනීමට නොපැමිණි පාර්සල් තුළ තිබී ශ්‍රී ලංකා රේගුවේ තැපැල් තක්සේරු අංශ නිලධාරීන් සොයාගෙන තිබේ.
මෙම පාර්සල් ප්‍රංශය , ඇමෙරිකාව ,කැනඩාව සහ නෙදර්ලන්තය යන රටවල සිට මහනුවර , මීගමුව , ජා ඇළ , වැල්ලවත්ත , නුගේගොඩ , තංගල්ල , මහියංගනය සහ යාපනය යන ප්‍රදේශ වල පිහිටි ලිපිනයන්ට භාර දීම සදහා කොළඹ මධ්‍යම තැපැල් හුවමාරුවට ලැබී තිබුණි .
මෙවැනි පාර්සල් 20 ක් ඉකුත් සති දෙකක කාළය තුළ මධ්‍යම තැපැල් හුවමාරුවට ලැබී තිබූ අතර ඒවා භාර ගැනීමට කිසිවෙකු නොපැමිණීම නිසා පසුගිය 19 දින ඒවා විවෘත කර පරීක්ෂා කිරිමට තැපැල්පතිවරයාගේ අනුමැතිය ලබා ගෙන ඇත.
එහිදී ඒවායින් පාර්සල් 14 ක ” කුෂ්” මත්ද්‍රව්‍ය ග්‍රෑම් 272 ක් සහ ” මෙතැම්පටමයින් ” මත්ද්‍රව්‍ය පෙති 2,049 ක් සොයා ගැනීමට රේගු තැපැල් තක්සේරු අංශයේ නිලධාරීන් සමත් වී තිබුණි .
