සංවිධානාත්මක අපරාධ කල්ලි සාමාජිකයකු ඩුබායි සිට දිවයිනට රැගෙන එයි
මිනීමැරුම්, කප්පම් ගැනීම් සහ මත්ද්‍රව්‍ය ජාවාරම් පිළිබඳ වරෙන්තු ලබා සිටි සංවිධානාත්මක අපරාධ කල්ලි සාමාජිකයකු බව කියන ගීත්මාල් බිනෝයි දිල්ෂාන්, අපරාධ පරීක්ෂණ දෙපාර්තමේන්තු විශේෂ නිලධාරීන් පිරිසක් විසින් ඩුබායි හිදී අත්අඩංගුවට ගෙන අද (29) අලුයම දිවයිනට රැගෙන ආවේය.
මෙම සැකකරු සංවිධානාත්මක අපරාධ කල්ලි නායකයෙකු වන මතුගම ශාන්ගේ ප්‍රධානතම ගෝලයා බව පොලිස් මාධ්‍ය ප්‍රකාශකවරයා පැවසීය.
කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් පිරිසක් මෙම ගුවන් යානය වෙත ගොස් මෙම අපරාධ කල්ලි සාමාජිකයා අත්අඩංගුවට ගෙන මේ පිළිබඳ වැඩිදුර විමර්ශන කටයුතු සිදු කරන මතුගම පොලිසියේ මූලස්ථාන පොලිස් පරීක්ෂකවරයා වෙත භාර දීමට කටයුතු කළහ.
