2025 අයවැය තුන්වන වර කියවීම වැඩි ඡන්ද 114කින් සම්මතයි
ජාතික ජන බලවේග රජයේ මංගල අයවැය (2025) වැඩි ඡන්ද 114කින් පාර්ලිමේන්තුවේදී අද (21) සම්මත විය.
අයවැය ලේඛනයට පක්ෂව ඡන්ද 159 ක් ලැබුණු අතර ඊට විරුද්ධව ලැබුණේ ඡන්ද 45ක් පමණි.
ජාතික ජන බලවේගයේ මන්ත්‍රීවරු අයවැයට පක්ෂවත් සමගි ජන බලවේගය, නව ප්‍රජාතන්ත්‍රවාදී පෙරමුණ, ශ්‍රී ලංකා පොදු ජන පෙරමුණ, දෙමළ ජාතික සන්ධානය යන දේශපාලන පක්ෂවල මන්ත්‍රීවරු අයවැයට විරුද්ධවත් ඡන්දය ප්‍රකාශ කළහ.
රාමනාදන් අර්චුනා මන්ත්‍රීවරයා අයවැයට විරුද්ධවද කාදර් මස්තාන් මහතා අයවැයට පක්ෂවද ඡන්දය ප්‍රකාශ කළහ.
ජනාධිපතිවරයා අයවැය ලේඛනය (අයවැය කතාව) පෙබරවාරි මස 17 වනදා පාර්ලිමේන්තුවට ඉදිරිපත් කිරීමෙන් පසු අයවැය විවාද දින විසි හයක් පුරා පැවැත්විණ.
අයවැය දෙවෙනි වර කියවීමේ විවාදය පෙබරවාරි මස 18 සිට පෙබරවාරි මස 25 දක්වාද අයවැය කාරක සභා අවස්ථාවේ විවාද පෙබරවාරි 27 වැනිදා සිට අද (21) දක්වාද පැවැත්විණ.
අද (21) පැවැත්වුණේ මුදල් ක්‍රම සම්පාදන සහ ආර්ථික කටයුතු පිළිබඳ අමාත්‍යාංශයේ වැය ශීර්ෂය පිළිබඳ අයවැය කාරක සභා අවස්ථාවේ විවාදයයි.
