පොලිස් නිල නිවෙස් භූමියේ උණ්ඩ ගබඩාවක්
ගලෙන් බිඳුණුවැව පොලිස් ස්ථානයේ කොස්තාපල්වරයෙකු පදිංචිව සිටි නිල නිවසක භූමියේ සඟවා තිබූ විවිධ වර්ගයේ ගිනි අවි වලට යොදන උණ්ඩ 341ක් සහ අත් බෝම්බ දෙකක් සොයාගත් ගලෙන් බිඳුණුවැව පොලිසිය පවසයි.
ටී 56 උණ්ඩ 281ක් සමග එම මැගසින් පහක්, එස් එල් ආර් වර්ගයේ උණ්ඩ, 84 එස් වර්ගයේ උණ්ඩ 06ක්, 84 එස් පුහුණු උණ්ඩ 07ක්, මිලිමීටර් 6 පිස්තෝල උණ්ඩ 03ක්, එස් එම් ජී මැගසීන් 1ක් සහ අත් බෝම්බ දෙකක් සොයා ගත් භාණ්ඩ අතර තිබූ බව පොලිසිය සඳහන් කළේය.
මෙම නිල නිවසේ සිටි පොලිස් කොස්තාපල්වරයා ඔහුගේ පවුලේ අය සමඟ ඉහත නිවසේ පදිංචිව සිට ඇති අතර 2022.2.11 දින වැඩ තහනමට ලක්ව ඇති බවද පොලිසිය පවසයි..
මෙම ආයුධ සම්බන්ධයෙන් ලද තොරතුරකට අනුව ඊයේ (02) පොලිසිය සිදු කළ සෝදිසියකදී ඉහත භාණ්ඩ සොයාගෙන ඇත.
සැකකාර කොස්තාපල්වරයා විසින් පාර්ශවයක් වෙත ලබාදීම සඳහා ඔහු පදිංචි ඉඩමේ වළ දමන්නට ඇති බවට පොලිසිය සැක කරයි.
