ඩුබායි පැන්න කොස්තාපල්ගේ වැඩ තහනම් කරයි
ගල්කිස්ස පොලිසියේ ගිනි අවි ගබඩාවෙන් ලබාගත් ටී 56 ගිනි අවිය සහ ජීව උන්ඩ 30 නැවත භාරනොදී ඩුබායි රටට පලා ගිය ආධුනික පොලිස් කොස්තාපල්වරයාගේ වැඩ තහනමට ලක්කළ බව පොලිස් මූලස්ථානය පවසයි.
මෙලෙස වැඩ තහනමට ලක් කර ඇත්තේ, 100430 ජේ ඒ කේ පි ජයකොඩි යන ආධුනික පොලිස් කොස්තාපල්වරයාගේය.
සැකකාර කොස්තාපල්වරයාට ඉකුත් 8 වෙනි දින සවස හයේ සිට පසු දින උදෑසන හයදක්වා කහට විට මාවත පාලම අසල මාර්ග බාධක රාජකාරී යෙදෙන ලෙසට නියෝග යොදා තිබී ඇතැයි පොලිසිය කියයි.
ඒ අනුව, කොස්තාපල්වරයා එම රාජකාරියේ නිරත වීම සඳහා අවි ගබඩාවෙන් අංක 28045840 දරන ටී 56 ගිනි අවිය සහ එම ජීව උන්ඩ 30 ක් ලබාගෙන පිටවීමේ සටහන් ඇතුළත් නොකර පොලිස් ස්ථානයෙන් බැහැරව ගොස් තිබිණි.
එදින කොස්තාපල්වරයා මාර්ග බාධක රාජකාරියට වාර්තා නොකර එයින් පැය හතරකට පසු ඩුබායි රාජ්‍ය කරා පලා ගොස් තිබිණි.
එකී විෂමාචාර ක්‍රියාව හේතුවෙන් ගල්කිස්ස පොලිස් අධිකාරි දිස්ත්‍රික් එක රෝහන් පුෂ්ප කුමාර මහතා විසින් මෙම වැඩ තහනම සිදුකර ඇත.
