විජේදාසට අධිකරණ සේවා සංගමයේ විරෝධය
අපක්ෂපාතී විනිසුරුවන් අපකීර්තියට පත්කිරීමේ අඛණ්ඩ උත්සාහයක් නිරීක්ෂණය වන බව ශ්‍රී ලංකා අධිකරණ සේවා සංගමය පවසයි.
මෑතකදී අධිකරණයට එරෙහිව පාර්ලිමේන්තුවේදී කරන ලද ප්‍රකාශ මීට උදාහරණ බවද එම සංගමය පෙන්වාදෙයි.
එම විවේචන අසත්‍යයෙන් සත්‍ය වෙන්කර නොගෙන අමාත්‍යවරයාගේ දේශපාලන පැවැත්ම අභියෝගයට ලක්කර ඇති නඩුකරවලදී අදාළ අධිකරණ නීත්‍යානුකූලව ලබාදුන් තීන්දු සහ නියෝග වලින් අතෘප්තියට පත්වීම මත සැලසුම් සහගතව සිදුකරන ලද්දක් බව අධිකරණ සේවා සංගමය පවසයි.
පාර්ලිමේන්තු සභාව තුළ දී අධිකරණ පද්ධතිය හෑල්ලු වන ප්‍රකාශ සිදුකිරීමෙන් ව්‍යවස්ථාදායකය හා අධිකරණය අතර අනවශ්‍ය ගැටුමක් ඇතිකිරීමට හේතුවිය හැකි බවත් එවැනි තත්ත්වයන් කොන්දේසි විරහිතව පරාජය කළ යුතු බවත් එම සංගමය පෙන්වා දෙයි.
නිවේදනයක් නිකුත් කරමින් එම සංගමය පවසන්නේ, පසුගියදා පාර්ලිමේන්තුවේදී අධිකරණ ඇමැති විජේදාස රාජපක්ෂ අධිකරණයට එරෙහිව සිදුකළ ප්‍රකාශ කිසිසේත්ම පිළිගත නොහැකි බවයි.
පාර්ලිමේන්තුව අමතමින් අධිකරණ ඇමැති විජේදාස රාජපක්ෂ ශ්‍රී ලංකාවේ පහළ අධිකරණවල දූෂණ ක්‍රියා සිදුවන බව සඳහන් කළේය.
කෙසේ වෙතත් දිසා විනිසුරුවරුන් සහ මහේස්ත්‍රාත්වරුන්ගෙන් සමන්විත අධිකරණ සේවා සංගමය පෙන්වාදෙන්නේ, මෙවැනි ප්‍රකාශ විධායකය සහ ව්‍යවස්ථාදායකය අතර ගැටුමක් ඇති කළ හැකි බවයි.
අදාළ සම්පුර්ණ නිවේදනය පහතින්
