ලාංකිකයන්ට එක්සත් අරාබි එමීර් රාජ්‍යයේ නව රැකියා අවස්ථා
ජනාධිපති ලේකම් ආචාර්ය නන්දික සනත් කුමානායක මහතා සහ ශ්‍රී ලංකාවේ එක්සත් අරාබි එමීර් රාජ්‍යයේ (UAE) තානාපති ඛලීඩ් නසර් අල්අමේරි (Khaled Nasser AlAmeri) මහතා අතර හමුවක් අද (16) පෙරවරුවේ ජනාධිපති ලේකම් කාර්යාලයේදී පැවැත්විණි.
ශ්‍රී ලංකාව සහ එක්සත් අරාබි එමීර් රාජ්‍ය අතර පවතින ද්විපාර්ශ්වික සබඳතා තවදුරටත් ශක්තිමත් කර ගනිමින් ශ්‍රී ලංකාවේ ආර්ථික වර්ධනයට අඛණ්ඩ සහාය ලබා දෙන බව තානාපතිවරයා මෙහිදී පැවසීය.
නව දේශපාලන ප්‍රවාහය තුළ එක්සත් අරාබි එමීර් රාජ්‍යයේ ආයෝජකයන්ට ශ්‍රී ලංකාවේ ආයෝජන සඳහා යහපත් අවස්ථාවක් උදා වී තිබෙන බව පෙන්වා දුන් ඛලීඩ් නසර් අල්අමේරි මහතා පසුගිය කාලය තුළ ආයෝජන සඳහා සුදුසු වාතාවරණයක් ශ්‍රී ලංකාව තුළ දක්නට නොතිබු බවද සඳහන් කළේය.
දැනට එක්සත් අරාබි එමීර් රාජ්‍යයේ ශ්‍රී ලාංකිකයන් එක්ලක්ෂ පනස්දහසක් පමණ රැකියාවල නිරතව සිටින බවත්, ඉදිරියේදී එම රැකියා අවස්ථා තවදුරටත් පුළුල් කිරීමට මෙන්ම ශ්‍රී ලංකාවේ වෘත්තිකයන්ට නව රැකියා අවස්ථා උදා කර දීමට අපේක්ෂා කරන බවත් ඛලීඩ් නසර් අල්අමේරි මහතා සඳහන් කළේය.
එමෙන්ම ශ්‍රී ලංකාව සමඟ වෙළෙඳ සබඳතා පුළුල් කර ගැනීමට එක්සත් අරාබි එමීර් රාජ්‍යය සූදානමින් සිටින බවත් ඉදිරියේදී ඒ පිළිබඳ නව ගිවිසුම් වලට එළැඹීමට අපේක්ෂා කරන බවත් තානාපතිවරයා වැඩිදුරටත් සඳහන් කළේය.
එක්සත් අරාබි එමීර් රාජ්‍යයේ නායකයන් සහ ආයෝජකයන් සමඟ හමුවකට මෙහිදී ජනාධිපති අනුර කුමාර දිසානායක මහතා වෙත ආරාධනා කළ ඛලීඩ් නසර් අල්අමේරි මහතා දෙරට අතර සබඳතා තවදුරටත් ශක්තිමත් කර ගැනීමට එය මනා පිටිවහලක් වනු ඇති බව පෙන්වා දුන්නේය.