ජංගම දුරකථන මිලදී ගැනීමේදී සැලකිය යුතු දෙයක් ගැන TRC දැනුම් දීමක්
පාරිභෝගිකයන් ජංගම දුරකථන මිලදී ගැනීමේදී ශ්‍රී ලංකා විදුලි සන්දේශ නියාමන කොමිෂන් සභාව අනුමත කරන ලද ජංගම දුරකථන පමණක් මිලදී ගත යුතු බව (TRCSL) එම ආයතනය විශේෂ නිවේදනයක් නිකුත් කරමින් සඳහන් කරයි.
එම ආයතනය පාරිභෝගිකයන්ගෙන් ඉල්ලා සිටින්නේ මිලදී ගැනීමට බලාපොරොත්තු වන දුරකථනයට විදුලි සන්දේශ නියාමන කොමිෂන් සභාවේ අනුමැතිය ඇති බව තහවුරු කර ගැනීමට එමි (IMEI) අංකය පරීක්ෂා කරන ලෙසය.
ජංගම දුරකථන ආවරණ කවරයේ එමි අංකය පෙන්වයි. IMEI (හිස්තැනක්) ඉලක්කම් 15 අංකය 1909 වෙත යැවීමෙන් IMEI අංකයේ වලංගුභාවය පරීක්ෂා කළ හැකිය.
ජංගම දුරකථනය ලියාපදිංචි කර තිබේද නැද්ද යන්න පිළිබඳව එමගින් ක්ෂණික පිළිතුරු පණිවිඩයක් ලැබෙනු ඇත.
පාරිභෝගිකයන් වංචා සඳහා හසුවීම වැළැක්වීම සඳහා විදුලි සන්දේශ නියාමන කොමිෂන් සභාව අනුමත දුරකථන පමණක් මිලදී ගන්නා ලෙස ඉල්ලා සිටී.