ගල්ඔයදී වන අලි 06ක් මීනගයාට බිලි
මඩකලපුව සිට කොළඹ දක්වා අද (20 ) අලුයම ධාවනය වූ මීනගයා රාත්‍රී දුම්රියට හබරණ පොලිස් වසමේ ගල්ඔය දුම්රියපොළ ආසන්නයේ අට දෙනෙකුගෙන් යුත් වන අලි රංචුවක් ගැටී, ඇති අතර ඉන් වන අලි 6දෙනෙකු මියගොස්, ඇති බව, හබරණ පොලිසිය පවසයි.
වන අලි දෙදෙනෙකු අසාධ්‍ය තත්ත්වයේ පසුවන අතර වන අලි රංචුව ගැටිමෙන් දුම්රිය එන්ජිමද පීලි පැන ඇති බව, ඒ සම්බන්ධ පරීක්‍ෂණ සිදුකරන හබරණ පොලිසිය සඳහන් කරයි.
දුම්රියේ ගමන් කළ මගීන් කොළඹ සිට පැමිණි වෙනත් දුම්රියකින් කොළඹ බලා රැගෙන යාමට කටයුතු කර ඇති අතර මීනගයා දුම්රිය එන්ජිම පමණක් ඉවත්කර මඩකලපුව දෙසට ගමන් කිරීමට කටයුතු සලසා තිබේ.
පීලි පැනීම හේතුවෙන් දුම්රිය මාර්ගයට ද අලාභ හානි සිදු වී ඇති අතර ගල්ඔය මඩකලපුව දුම්රිය මාර්ගයේ ගමනාගමන කටයුතු සම්පූර්ණයෙන්ම අවහිර වී ඇති බව දුම්රිය දෙපාර්තමේන්තුවේ බලධාරියකු සඳහන් කළේය.
දුම්රිය දෙපාර්තමේන්තුවේ නිලධාරින් සහ කම්කරුවන් දුම්රිය පීලිගත කිරීමට මේ වනවිට කටයුතු කරමින් සිටිති. එම ස්ථානයට ගල්ඔය පොලිස් මුරපලේ පොලිස් ස්ථානාධිපති ඇතුළු නිළධාරීන් විසින් ආරක්ෂාව සපයා තිබේ.
