බස්නාහිර පළාතේ ගුරු පුරප්පාඩු 4000ක්
බස්නාහිර පළාතේ ගුරු පුරප්පාඩු 4000කට අධික සංඛ්‍යාවක් පවතින බව පළාත් ප්‍රධාන අමාත්‍යාංශය පවසයි.
ඉංග්‍රීසි, දෙමළ හා තොරතුරු තාක්ෂණය යන විෂයන්ට අදාළ ගුරු හිඟය උග්‍රව පවතින බවයි, බස්නාහිර පළාත් ප්‍රධාන ලේකම් ධම්මිකා විජේසිංහ මහත්මිය සඳහන් කළේ.
මීට අමතරව ඉංග්‍රීසි මාධ්‍යයෙන් විෂයන් උගන්වන ගුරු හිඟයක් පවතින බව ද ඇය සඳහන් කළා ය.
මීට පිළියමක් ලෙස යෝජනා කිහිපයක් ක්‍රියාත්මක කිරීමට පළාත් සභාවේ අවධානය යොමු කර ඇති බව ද ලේකම්වරිය පැවසුවාය.
ඒ අනුව පේරාදෙණිය හා කොළඹ විශ්වවිද්‍යාල වලින් පිට වූ අධ්‍යාපනවේදී උපාධිධාරීන් පිරිසක් ගුරු සේවයට බඳවා ගැනීමට නියමිතයි.
දැනට පාසල්වල සිටින සංවර්ධන නිලධාරීන් පිරිසක් ද සුදුසුකම් මත ගුරු සේවයට බඳවා ගැනීමට සැලසුම් කර ඇති බව ප්‍රධාන ලේකම්වරිය පැවසුවාය.
පසුගිය කාලයේ පැවැත් වූ තරග විභාගයෙන් සමත්වූ උපාධිධාරීන් 3900කට අධික සංඛ්‍යාවක් බස්නාහිර පළාත් ගුරු සේවයට බඳවා ගැණුනි.