මහජන ආරක්ෂක අමාත්‍යංශයේ හිටපු ලොක්කෙක් පැයෙන් පාස්පෝර්ට් අරන් ගිහින්
මහජන ආරක්ෂක අමාත්‍යංශයේ හිටපු ලේකම් වියානි ගුණතිලක අද (01) පෙරවරුවේ ආගමන හා විගමන දෙපාර්තමේන්තුව වෙත පැමිණ පැයක කාලයක් ඇතුළත තම නව ගුවන් ගමන් බලපත්‍රය ලබාගෙන තීබේ.
පෙරවරු 10.15ට පැමිණි ඔහු 11.30 වනවිට තමා සතුව පැවැති රාජතාන්ත්‍රික ගුවන් ගමන් බලපත්‍රය අවලංගු කර N11540935 අංක දරන සාමාන්‍ය ගුවන් ගමන් බලපත්‍රයක් ලබාගෙන ඇති බවට වාර්තා විය.
ආගමන හා විගමන දෙපාර්තමේන්තුවේ පාලක (ප්‍රත්‍යන්ත පාලන හා තොරතුරු තාක්ෂණ) නිලධාරී ඉන්දික හේරත් මහතා මේ සඳහා සහාය දක්වා ඇති බව සඳහන්ය.
මොහු වියානි ගුණතිලක හට කඩිනමින් මෙම ගුවන් ගමන් බලපත්‍රය ලබාගත හැකි පරිදි අංක 3001 දරන ටෝකන් පත නිකුත් කර අදාළ කාර්ය‍ය පැයක් ඇතුළත අවසන් කරදී තිබේ.
ඉන්දික හේරත් නම් තැනැත්තා මෙම තනතුරට පත් වූයේද පැවති ආණ්ඩුවේ දී මහජන ආරක්ෂක අමාත්‍යංශ ලේකම්ව සිටි වියානි ගුණතිලක සහ පාලක ජනරාල් හර්ෂ ඉලුක්පිටියගේ සහයෝගයෙනි.
සාමාන්‍ය ජනතාව දීර්ඝ කාලයක් පෝලිමේ සිට සති දෙකකට ඉදිරියෙන් තිබෙන දිනයකට ටෝකන් ගෙන අයදුම්පත් බාර දීමට පැමිණෙන තත්ත්වයක් පවතින වාතාවරණයක මෙම අර්බුදයට එක් හේතුවන් වූ වියානි VIP පර්යන්තයෙන් පැයක පමණ කාලයක් ඇතුළත මෙම බලපත්‍රය ලබාගෙන අවසන් වීම ගැටලු සහගත කාරණයක් වේ.