හික්කඩුවේ නවතා තිබූ ‘නයනා කුමාරි’ කෝච්චියෙන් රුපියල් කෝටියක කේබල් හොරු කපන් ගිහින්
කොළඹ සිට හික්කඩුව දුම්රිය ස්ථානය වෙත පැමිණ එහි නවතා තිබූ ‘නයනා කුමාරි’ ශීඝ්‍රගාමී දුම්රියෙන් රුපියල් කෝටියකට අධික විදුලි රැහැන් සොරකම් කර තිබේ.
දුම්රිය ආරක්ෂක බළකාය භාර නියෝජ්‍ය අධිකාරී ජී.ඩබ්ලිව්. සුමිත් මහතා පැවසුවේ, බ්‍රහස්පතින්දා අලුයම මෙම කොල්ලකෑම සිදු කර ඇති බවයි.
අදාළ සොරුන් විශේෂයෙන් ඉලක්ක කර ඇත්තේ මගී මැදිරි තුළ ආලෝක පද්ධතිය බල ගැන්වීම සඳහා භාවිත කරන කේබල් බවයි, දුම්රිය ආරක්ෂක නිලධාරීන් පවසා සිටියේ.
මෙය හොඳින් සැලසුම්කර සිදුකරන ලද සොරකමක් බවත් විදුලි පරිපථ පිළිබඳ සංකීර්ණ අවබෝධයක් ඇති එවැනි තාක්ෂණයක් ගැන හුරුපුරුදු පුද්ගලයින් විසින් මෙය සිදුකර ඇති බවට බලධාරීන් සැක පළ කරයි.
සිද්ධිය සම්බන්ධයෙන් ගාල්ල පොලීසියේ අපරාධ විමර්ශන අංශය මේ වන විට පුළුල් පරීක්ෂණයක් ආරම්භ කර තිබේ.