නොතීසි ලැබුනොත් අධිකරණයේ පෙනී සිටින්නැයි නාමල්ට නියෝගයක්
කොළඹ කොටුව ක්‍රිෂ් ට්‍රාන්ස්වර්ඩ් චතුරස්‍රයේ අක්කර 4.3ක් බදු දීමේ දී සිදු වී ඇතැයි කියන රුපියල් මිලියන 70ක මුදල් අක්‍රමිකතාව සම්බන්ධයෙන් හිටපු ක්‍රීඩා ඇමති පාර්ලිමේන්තු මන්ත්‍රී නාමල් රාජපක්ෂ මහතාට එරෙහිව පවරා ඇති නඩුව සම්බන්ධයෙන් නොතීසියක් ලදහොත් අධිකරණයේ පෙනී සිටින ලෙස කොටුව මහේස්ත්‍රාත් නිලුපුලී ලංකාපුර අද (26) සැකකාර නාමල් රාජපක්ෂට නියෝග කළා.
සිද්ධිය සම්බන්ධයෙන් නඩුව කැඳවූ අවස්ථාවේ දී මහේස්ත්‍රාත්වරිය මෙම නියෝගය නිකුත් කළා.
විමර්ශන අවසන් ද නැද්ද යන්න අධිකරණයට දැනුම්දෙන ලෙස කළ නියෝග ප්‍රකාරව අධිකරණයට කරුණු දැක්වූ පොලිස් මූල්‍ය අපරාධ විමර්ශන කොට්ඨාසය විමර්ශන අවසන් නැති බව අධිකරණයට දැනුම් දුන්නා.
අදාළ නීති කෘත්‍යයට අදාළව කොළඹ මහාධිකරණයේ අධි චෝදනා ගොනු කර ඇති බව පොලිසිය අධිකරණයට දන්වා සිටියා.
ඒ අනුව නඩුව බහා තබන ලෙසත්, අවශ්‍ය වුවහොත් අධිකරණයේ පෙනී සිටින ලෙසත්, මහේස්ත්‍රාත්වරිය දැනුම් දුන්නා.
මෙම සිද්ධිය සම්බන්ධයෙන් සැකකරුවෙකු ලෙස නම් කර ඇති පාර්ලිමේන්තු මන්ත්‍රී නාමල් රාජපක්ෂ මහතා වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් අධිකරණයට කරුණු දැක්වූවා.
එම සිද්ධිය සම්බන්ධයෙන් ඇප මත මුදා හැර ඇති පාර්ලිමේන්තු මන්ත්‍රී නාමල් රාජපක්ෂ නඩුව කැඳවූ අවස්ථාවේදී විවෘත අධිකරණයේ පෙනී සිටියා.
