මිද්දෙණිය ඝාතනයේ තවත් තොරතුරු එළියට
මිද්දෙණිය, කඩේවත්ත හන්දිය ප්‍රදේශයේ සිදුකළ වෙඩිතැබීමෙන් මියගොස් ඇත්තේ, අරුණ විදානගමගේ නොහොත් “කජ්ජා” නැමැති අනුවර්ත නාමයෙන් හඳුන්වන පුද්ගලයෙක් බවට තොරතුරු අනාවරණය වී තිබේ.
වෙඩි වැදී මිය ගිය පුද්ගලයා අපරාධ රැසකට සම්බන්ධ බවට ද තොරතුරු වාර්තා වේ.
මියගිය පුද්ගලයාගේ බිරිඳ විදෙස් ගතව සිටින අතර ඔහු දරුවන් දෙදෙනා සමග ජීවත්ව ඇති බවට මූලික විමර්ශනෙ වලදී අනාවරණය වී තිබෙනවා.
මිද්දෙණිය, කඩේවත්ත හන්දිය ප්‍රදේශයේ ඊයේ (18) රාත්‍රියේ සිදුකළ වෙඩිතැබීමකින් සය හැවිරිදි දැරියක ඇතුළු පුද්ගලයින් දෙදෙනෙකු ජීවිතක්ෂයට පත්ව තිබෙනවා.
පොලීසිය පැවසුවේ සංවිධානාත්මක අපරාධ කල්ලි සාමාජිකයෙකු ඉලක්ක කළ එම වෙඩි ප්‍රහාරයෙන් බරපතළ තුවාල ලැබූ 9 හැවිරිදි තවත් පිරිමි දරුවෙකු මේවනවිට රෝහල්ගතව ප්‍රතිකාර ලබන බවයි.
වෙඩිතැබීම සිදුකරන අවස්ථාවේදී ඔහුගේ දියණිය සහ පුත්‍රයාද ඔහු සමග යතුරුපැදියේ ගමන් කර තිබුණා.
වෙඩි ප්‍රහාරයෙන් වෙඩික්කරුවන්ගේ ඉලක්කය වූ 39 හැවිරිදි අරුණ විදානගමගේ නොහොත් කජ්ජා නැමැති අනුවර්ත නාමයෙන් හඳුන්වන පුද්ගලයා එම ස්ථානයේදීම ජීවිතක්ෂයට පත්ව තිබුණා.
ඉන් යතුරුපැදියේ ගමන් කළ කුඩා දියණිය සහ පුත්‍රයාද බරපතළ තුවාල ලබා ඇති අතර 6 හැවිරිදි දියණිය තංගල්ල මූලික රෝහලට ඇතුළත් කිරීමෙන් අනතුරුව මිය ගොස් තිබෙනවා.
සිද්ධියෙන් බරපතළ තුවාල ලැබූ 09 හැවිරිදි පුත්‍රයා මේවනවිට ප්‍රතිකාර ඇඹිලිපිටිය මහ රෝහලේ ප්‍රතිකාර ලබනවා.
පොලීසිය පැවසුවේ T56 වර්ගයේ ගිනිඅවියක් යොදා ගනිමින් වෙඩිතැබීම සිදුකර ඇති බවයි.
වෙඩික්කරුවන් අත්අඩංගුවට ගැනීමට මිද්දෙණිය පොලිසීය විමර්ශන ආරම්භ කර තිබෙනවා.
