සරුංගල් ගුවන්ගත කර ගෘහස්ථ විදුලිය නිපදවීමේ ක්‍රමවේදයක්
සරුංගල් ගුවන්ගත කරමින් ගෘහස්ථ විදුලිය නිපදවීමේ ක්‍රමවේදයක් ආරම්භ කර ඇති බව ආතර් සී ක්ලාක් මධ්‍යස්ථානයේ සභාපති මහාචාර්ය චන්දන ජයරත්න සහ ශ්‍රී ලංකා භෞතික විද්‍යා ආයතනයේ සභාපති ආචාර්ය චින්තක ද සිල්වා යන මහත්වරුන් පවසයි.
පසුගිය සති කිහිපය තුළ නුවරඑළිය මහ නගර සභාවේ නාගරික කොමසාරිස් ඉශාන් විජයතිලක මහතා ඇතුළු නුවරඑළිය මහ නගර සභාව සහ රාවණ ගුවන් සරුංගල් සංගමයේ උපදෙස් මත පැවැත්වූ සරුංගල් සංදර්ශනයෙන් අනතුරුව සිදුකළ පරීක්ෂණයක ප්‍රතිඵලයක් වශයෙන් මෙය සිදු කෙරෙන බවයි මහාචාර්ය චන්දන ජයරත්න මහතා මාධ්‍ය හමුවේ කියා සිටියේ.
සුළං බලයෙන් බලශක්තිය නිපදවීම සාමාන්‍ය දෙයක් වුණත් ඒ සාමාන්‍ය දෙයින් ඔබ්බට ගිහින් සරුංගලයක් ගුවන් ගත කර බලශක්තිය නිපදවීමේ ක්‍රියාදාමය අපි නුවරඑළියෙන් ආරම්භ කරන්නට බලාපොරොත්තු වෙනවා.
ලංකාවට මේක අලුත් සංකල්පයක් වුණත් ඇමරිකාව වගේ ප්‍රබල බලවත් රටවල් වල සරුංගලයකින් ගෙවල් පහකට වගේ බල ශක්තිය ලබාදෙනවා.
ලංකාවේ ක්‍රියාත්මක සියලුම සරුංගල් සංගම් සමග සාකච්ඡා කොට ඉදිරියේදී සරුංගල් ගුවන් ගත කරමින් ගෘහස්ථ විදුලිය නිපදවීමේ මෙම සංකල්පය සාර්ථකව ශ්‍රී ලංකාවට හඳුන්වා දීමට අප කටයුතු කරනවා
මෙහිදි අදහස් දැක්වූ ශ්‍රී ලංකා භෞතික විද්‍යා ආයතනයේ සභාපති ආචාර්ය චින්තක ද සිල්වා මහතා
නියත වශයෙන්ම පුනර්ජනනීය බල ශක්තිය ලෝකයේ සෑම ස්ථානයකටම වර්තමානය වන විට අවශ්‍ය වෙලාතිබෙනවා.ඒ උවමනාව සපුරමින් සරුංගල් ගුවන්ගත කිරීම හරහා නව ක්‍රමවේදයක් ඔස්සේ පුනර්ජනනීය බල ශක්තිය නිපදවීමේ ක්‍රියාවලියක් හඳුන්වා දීමට තමයි අපි විද්‍යාඥයන් හැටියට මේ බලාපොරොත්තු වෙන්නේ.
දැනට සිදුකළ අත්හදා බැලීම් වලින් අනාවරණය වෙලා තියෙන්නේ අඩි පන්සියයක් හෝ ඊට වැඩිය උස අහසේ පියාසර කරන සරුංගල් හරහා පුනර්ජනනීය බල ශක්තිය සාර්ථකව නිපදවා ගැනීමට හැකිවන බවයි.
ටෙරාවෝට් 1800ක පමණ විදුලියක් එක් සරුංගලයක් නිවැරදිව ක්‍රමානුකූලව ගුවන් ගත කිරීමෙන් නිපදවා ගන්නට පුළුවන්කම අපට තියෙනවා. ඒකෙන් විශාල වැඩ කොටසක් කරගන්නටත් අපට හැකි වෙනවා යනුවෙන් පැවසිය.