හීත්‍රෝ ගුවන් තොටුපොළ තාවකාලිකව වැසේ – ශ්‍රීලංකන් ගුවන් ගමනුත් නවතියි
ලන්ඩනයේ හීත්‍රෝ ගුවන් තොටුපොළ ආසන්නයේ ඇති විදුලි උප පොළක ඇතිවූ ගින්නක් හේතුවෙන් අද (21) රාත්‍රී 12 වන තෙක් පැය 24 ක කාලයක් සඳහා එම ගුවන් තොටුපොළ තාවකාලිකව වසා දැමීමට බලධාරීන් කටයුතු කර තිබේ.
ගුවන් තොටුපොළ වසා දැමීමත් සමග පැමිණෙමින් තිබූ ගුවන් යානා 120 ක් පමණ වෙනත් ගුවන් තොටුපොළවල් වෙත හරවා යැවීමටත්, අනෙකුත් පැමිණීමට නියමිතව තිබූ ගුවන් යානා සහ හීත්‍රෝ ගුවන් තොටුපොළෙන් පිටවීමට නියමිතව තිබූ ගුවන් යානා සියල්ලද අවලංගු කිරීමට බලධාරීන් කටයුතු කර ඇත.
විදුලි උප පොළේ ඇතිවූ ගින්න හේතුවෙන් ගුවන් තොටුපොළ විදුලිය වරින්වර විසන්ධි වීම එළෙස ගුවන් තොටුපොළ වසා දැමීමට ප්‍රධාන හේතුවක් වී තිබේ.
හීත්‍රෝ ගුවන් තොටුපොළ ලොව කාර්ය බහුලම ගුවන් තොටුපොළවල්වලින් එකක් වන අතර සෑම තත්පර 45 කට වරක් ගුවන් යානයක් එම ගුවන් තොටුපොළට පැමිණීම හෝ පිටවීම සිදු කරයි.
තවමත් විදුලිය ස්ථාවරව ලැබෙන කාලයක් පැවැසීය නොහැකි බවත් ගුවන් තොටුපොළ නැවත විවෘත කරන තෙක් කිසිම මගියෙකු ගුවන් තොටුපොළට පැමිණීමෙන් වැළකිය යුතු බවත් ගුවන් තොටුපොළ බලධාරීන් ප්‍රකාශ කළේය.
මෙම සිදුවීම හේතුවෙන් අද (21) දිනයට සිදුකිරීමට නියමිතව තිබූ ශ්‍රී ලංකන් ගුවන් සේවයේ ගමන්වාර 2ක්ද අවලංගු කිරීමට සිදුව තිබේ.
මේ පිළබඳ නිවේදනයක් නිකුත්කරමින් ශ්‍රීලංකන් ගුවන් සේවය පවසා සිටියේ, අද පැය 12:50ට පිටත් වීමට නියමිතව තිබූ UL 503 (කොළඹ සිට ලන්ඩන් දක්වා) සහ පැය 20:40 ට පිටත් වීමට නියමිතව තිබූ UL 504 (ලන්ඩන් සිට කොළඹ දක්වා) ගුවන් ගමන් ක්‍රියාත්මක නොවන බවයි.
බලපෑමට ලක් වූ මගීන් සඳහා අවශ්‍ය පහසුකම් සැලසීමට පියවර ගෙන ඇති බවත් හීත්‍රෝ ගුවන්තොටුපොළෙහි ඇති වී තිබෙන තත්ත්වය සමීපව නිරීක්ෂණය කරමින් සිටින බවත් ශ්‍රීලංකන් ගුවන් සේවය පවසයි.
එමෙන්ම හීත්‍රෝ ගුවන්තොටුපොළ නැවත විවෘත කළ වහාම ලන්ඩනයට ගුවන් ගමන් නැවත ආරම්භ කරනු ඇති බවත් එම නිවේදනයේ වැඩිදුරටත් දැක්වේ.
මේ සම්බන්ධයෙන් ශ්‍රීලංකන් ගුවන් සේවය නිකුත් කළ නිවේදනයේ වැඩිදුරටත් මෙසේ සඳහන් වේ.
“වැඩිදුර සහාය ලබාගැනීම සඳහා කරුණාකර 1979 (ශ්‍රී ලංකාව තුළ), +94117 77 1979 (ජාත්‍යන්තර) හෝ +94744 44 1979 (WhatsApp chat) ඔස්සේ ශ්‍රීලංකන් ගුවන් සේවා පාරිභෝගික සේවා මධ්‍යස්ථානය හෝ ළඟම ඇති ශ්‍රීලංකන් ගුවන් සේවා කාර්යාලය හෝ සංචාරක නියෝජිතයා අමතන ලෙස ඉල්ලා සිටිමු.
මේ සම්බන්ධයෙන් ඔබට සිදුවූ අපහසුතාව පිළිබඳව අපගේ කණගාටුව ප්‍රකාශ කර සිටින අතර ඔබගේ ඉවසීම සහ අප වෙත ලබාදෙන සහයෝගය වෙනුවෙන් අපගේ අවංක ස්තූතිය පලකර සිටින්නෙමු” යනුවෙනි.
