පරිපූරක වෛද්‍ය වෘත්තීයවේදීන්ගෙන් අනතුරු ඇඟවීමක්
පරිපූරක වෛද්‍ය උපාධිධාරින් බඳවා ගැනීමට වහාම පිළියමක් යොදන්නැයි රජයෙන් ඉල්ලීමක් කරන බවත් සම සෞඛ්‍ය ශිෂ්‍යයන්ගේ අරගලයට පහරදී ගැටලුව යටපත් කරන්නට උත්සාහ කලහොත්, වර්ජන ක්‍රියා මාර්ගයක් ආරම්භ කරන බවත් පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලය පවසයි.
සම සෞඛ්‍ය ශිෂ්‍යයන්ගේ ගැටලුවට පිළියමක් ලෙස වහාම ක්‍රියාත්මක වන පරිදි ඔවුන්ව සීමාවාසික පුහුණුවට අනුයුක්ත කළ හැකි බවද එහි සභාපති රවී කුමුදේශ් මහතා සඳහන් කළේය.
මුදල් අමාත්‍යාංශයට අමතර ප්‍රතිපාදන මේ සඳහා ලබාදිය නොහැකි නම්, පරිපූරක වෛද්‍ය වෘත්තිවේදී ඩිප්ලෝමාධාරීන් පුහුණුව සඳහා වෙන්කර ඇති ප්‍රතිපාදන භාවිතා කිරීම සෞඛ්‍ය ලේකම්වරයාගේ එක පෑන් පහරකින් සිදු කළ හැක බවද ඔහු කීවේය.
වසර පහක පමණ කාලයක් තිස්සේ වෛද්‍ය රසායනාගාර ඩිප්ලෝමා පාඨමාලාවට සිසුන් බඳවාගෙන නොමැති බැවින් හා ඉදිරියේදී කිසිදු පරිපූරක වෛද්‍ය වෘත්තිකයෙකු ඩිප්ලෝමා පාඨමාලා සඳහා බඳවා නොගන්නා බැවින් එම ප්‍රතිපාදන මගින් සියලු ගැටලු විසඳාගත හැකිව තිබියදී බරපතල අර්බුදයක් නිර්මාණය කොට ඇතැයිද කුමුදේශ් මහතා සඳහන් කළේය.
උපාධිධාරීන් සීමා වාසික පුහුණට අනුයුක්ත කිරීමෙන් පසු රැකියාවට බඳවා ගැනීමේ ගැටලුව විසඳීම සඳහා මාස හයක කාලයක් රජයට සහ සෞඛ්‍ය අමාත්‍යාංශයට තිබියදී, උපාධිධාරීන්ව පාරට බස්සවා, ඔවුන්ට පොලිසිය මගින් ප්‍රහාර එල්ල කර සිරගත කිරීම කිසිසේත්ම අනුමත කළ නොහැකි බවද ඔහු පැවසීය..
පරිපූරක වෛද්‍ය සේවාවේ අනුමත නිලධාරී සංඛ්‍යාව වසර විස්සකින් පමණ යථාවත් වී නොමැති බැවින්, දැනට අනුමත නිලධාරී සංඛ්‍යාව සේවාව පවත්වාගෙන යාම සඳහා කිසිසේත්ම ප්‍රමාණවත් නොමැති බවද ඔහු සඳහන් කළේය.
අනුමත නිලධාරී සංඛ්‍යාව යාවත්කාලීන කරමින් සෞඛ්‍ය අමාත්‍යාංශය විසින් අනුමත කර ඉදිරිපත් කරන ලද ඉල්ලීම සඳහා මුදල් අමාත්‍යවරයා ලෙස ජනාධිපතිවරයාගේ එක පෑන් පාරක් ලබා දිය හැකිනම්, කිසිදු විභාගයකින් තොරව මෙම සියලු උපාධිධාරින් සේවයට බඳවා ගත හැකි බවද කුමුදේශ් මහතා තවදුරටත් කීවේය.
