සම්මානිත මහාචාර්ය ගණනාත් ඔබේසේකර දිවියට සමුදෙයි
ඇමෙරිකාවේ ප්‍රින්ස්ටන් විශ්ව විද්‍යාලයේ මානව විද්‍යාව පිළිබඳ සම්මානිත මහාචාර්යවරයෙකු වන ගණනාත් ඔබේසේකර මහතා අභාවප්‍රාප්ත වී තිබේ.
මියයන විට ඒ මහතා 95 වැනි විය පසුවිය.
ඔබේසේකර මහතා 1930 වසරේ පෙබරවාරි මස 2 වැනිදා උපත ලබා ඇති අතර, ඔහු 1955 වසරේදී පේරාදෙණිය විශ්ව විද්‍යාලයෙන් ඉංග්‍රීසි භාෂාව පිළිබඳ ශාස්ත්‍රවේදී උපාධිය ලබාගෙන ඇත.
අනතුරුව 1958 වසරේදී පශ්චාත් උපාධියත්, 1964 වසරේදී මානව විද්‍යාව පිළිබඳ ආචාර්ය උපාධියත් ඇමෙරිකාවේ වොෂිංටන් විශ්ව විද්‍යාලයෙන් හිමිකර තිබේ.
ශ්‍රී ලංකා විශ්ව විද්‍යාලයේ සමාජ විද්‍යා අංශයේ ප්‍රධානියා ලෙසද මහාචාර්යවරයකු ලෙස ගණනාථ ඔබේසේකර මහතා 1968 වසරේ සිට 1972 වසර දක්වා කටයුතු කර ඇති අතර 1972 වසරේ සිට 1980 දක්වා කැලිෆෝනියා විශ්ව විද්‍යාලයේ මානව විද්‍යාව පිළිබඳ ආචාර්යවරයකු ලෙසද කටයුතු කර ඇත.
ඇමෙරිකාවේ ප්‍රින්ස්ටන් විශ්ව විද්‍යාලයේ මානව විද්‍යා දෙපාර්තමේන්තුවේ සභාපතිවරයා ලෙසද කටයුතු කර ඇති ගණනාත් ඔබේසේකර මහතා 1980 වසරේ සිට 2000 වසර දක්වා එම විශ්ව විද්‍යාලයේ මහාචාර්යවරයකු ලෙස සේවය කළේය. අනතුරුව 2000 වසරේදී ඔහු සේවයෙන් විශ්‍රාම ගෙන ඇත.
ගණනාත් ඔබේසේකරයන් ශ්‍රී ලංකාවේ බුදුදහම, ජනවාර්ගික අර්බුදය වැනි විෂයන් කෙරෙහි ඉතා බලපෑම්සහගත අධ්‍යයන සිදුකළ මානව විද්‍යාඥයෙකි .
ඔහු ග්‍රන්ථ 15 කට ආසන්න සංඛ්‍යාවක් රචනා කර ඇත. දුටුගැමුණුගේ හෘදසාක්ෂිය, ප්‍රොතෙස්තන්ත බුදුදහම සහ පත්තිනි ඇදහිල්ල කාගේත් අවධානය හිමිවූ ඒ මහතාගේ අධ්‍යන අතර විය.
