ජීව උණ්ඩ සමඟ ගබඩා සහායක අත්අඩංගුවට
ටී 56 ජීව උණ්ඩ සහ එල්.එම්.ජී අවි සඳහා යොදන උණ්ඩ සමඟ නුගේගොඩ ජාතික ප්‍රවාහන වෛද්‍ය ආයතනයේ ගබඩා සහායකවරයා අත්අඩංගුවට ගත්බව කොළඹ දකුණ කොට්ඨාස අපරාධ විමර්ශන අංශය පවසයි.
එම සැකකරු සමඟ ටි 56 ජීව උණ්ඩ 09 ක් එල්.එම්.ජී අවි සඳහා යොදන උණ්ඩ 01 ක් පොලිස් භාරයට ගෙන ඇත.
කොළඹ දකුණ කොට්ඨාස අපරාධ විමර්ශන අංශයට ලැබුණු තොරතුරක් අනුව බොරැල්ල ඕවල් ක්‍රීඩාංගනය අසලදී සැකකරු පරීක්ෂා කිරීමේදී ඔහු සන්තකයේ තිබූ ගමන් බෑගයේ තිබී ටී 56 අවියට භාවිතා කරන ජීව උණ්ඩ 2 ක් හමුවී ඇත.
අනතුරුව ඔහු පදිංචි බත්තරමුල්ල රුහුණු පුර ප්‍රදේශයේ නිවස පරීක්ෂා කිරීමේදී නිවස තුළ තිබී තවත් ටි 56 ජිව උණ්ඩ 7 ක් හා එල්.එම්.ජී අවිවලට යොදන ජීව උණ්ඩයක්ද සොයා ගැනීමට පොලිස් නිලධාරීන්ට හැකි වී ඇත.
අත්අඩංගුවට ගත් සැකකරු වයස අවුරුදු 24 ක පුද්ගලයෙකි.
සැකකරු අලුත් කඩේ මහේස්ත්‍රාත් අධිකරණය වෙත ඉදිරිපත් කිරීමට නියමිතය.
කොළඹ දකුණ කොට්ඨාස අපරාධ විමර්ශනාංශයේ ස්ථානාධිපති පොලිස් පරීක්ෂක අජිත් කුමාර මහතා ඇතුළු කණ්ඩායමක් පරීක්ෂණ පවත්වයි.
