ජෝ බයිඩන්ගෙන් පුතුට ජනාධිපති සමාව
ධුරයෙන් සමු ගැනීමට සූදානමින් සිටින ඇමෙරිකන් ජනාධිපති ජෝ බයිඩන්, සිය පුත්‍රයා වන හන්ටර් බයිඩන්ට ජනපති සමාව ලබා දී තිබෙනවා.
බයිඩන්, සිය බලතල භාවිතයට ගනිමින්, පුතු බයිඩන්ට සමාව දීම කිසිසේත් අනුමත කළ නොහැකි යැයි ප්‍රතිවාදී රිපබ්ලිකන්වරු චෝදනා කරයි.
54 හන්ටර් බයිඩන්ට බරපතල චෝදනා දෙකක් එල්ල වී ඇති අතර, අධිකරණය හමුවේ එම චෝදනා දෙකටම ඔහු වරදකරු වී සිටී. ජෝ බයිඩන් පුත් හන්ටර්ට ජනාධිපති සමාව දී තිබෙන්නේ හන්ටර් බයිඩන්ට දඬුවම් නියම කිරීමට සූදානම් අවස්ථාවකදීය.
තමන්ගේ තීරණය සම්බන්ධයෙන්, ජෝ බයිඩන් මාධ්‍ය හමුවේ පැහැදිලි කර ඇත්තේ, තම පුතාට අසාධාරණ අයුරින් චෝදනා එල්ල වූ බවත්, එම චෝදනා හමුවේ ඔහු හුදෙකලා වීම සැලකිල්ලට ගනිමින් ඔහුට සමාව දීමට තීරණය කළ බවත්ය.
හන්ටර් බයිඩන් ඇමෙරිකන් නීතීඥවරයකු මෙන්ම ව්‍යාපාරිකයකු ද වෙයි. කලක් ඔහු මත්ද්‍රව්‍ය වලට ඇබ්බැහි වී සිටියේය.
එම කාලයේ ඒ බව වසං කරමින්, හන්ටර් බයිඩන් ගිනි අවියක් මිලදී ගෙන එය ළඟ තබාගෙන සිටියේය. මෙය බරපතල වරදක් බවයි පැවසෙන්නේ.
මේ සම්බන්ධයෙන් හන්ටර් බයිඩන් අධිකරණය හමුවේ වරදකරු විය. ඊට අමතරව, බදු වංචා සිද්ධියක් සම්බන්ධයෙන් ද හන්ටර් බයිඩන්ට චෝදනා එල්ල වී තිබුණු අතර, ඔහු එම චෝදනා සම්බන්ධයෙන් ද වරදකරු විය.
බැරැක් ඔබාමා ඇමෙරිකාවේ ජනාධිපති ධුරය හොබවද්දී, බයිඩන් ඔහුගේ උප ජනාධිපති ලෙස කටයුතු කළේය. එම කාලයේ පියාගේ බලතල අනුව යමින්, යුක්රේනය සමඟ ආන්දෝලනාත්මක ගනුදෙනු රැසක් කළේ යැයි ද හන්ටර් බයිඩන්ට චෝදනා එල්ල වී තිබේ.