කඩාවැටුණු ගුවන් යානය ගැන විමර්ශනයට විශේෂ පරීක්ෂණ කමිටුවක්
ශ්‍රී ලංකා ගුවන් හමුදාවට අයත් පුහුණු ජෙට් යානයක් කඩාවැටීමෙන් සිදු වූ අනතුර පිළිබඳ විමර්ශනයට ගුවන් හමුදාපති එයාර් මාර්ෂල් බන්දු එදිරිසිංහ විසින් 7ත් දෙනෙකුගෙන් යුත් විශේෂ පරික්ෂණ කමිටුවක් පත් කර තිබේ.
ශ්‍රී ලංකා ගුවන් හමුදා කටුනායක මුලික කදවුරේ පිහිටි ගුවන් හමුදා අංක 05 ප්‍රහාරක බලඝණයට අනියුක්ත කර ඇති ගුවන් නියමුවන්ගේ උසස් පුහුණවීම සදහා යොදාගනු ලබන K – 8 වර්ගයේ ගුවන් යානයක් අද දින උදෑසන (21) පුහුණුවීමක් අතරතුර කුරුණෑගල වාරියපොල ප්‍රදේශයේදී හදිසි අනතුරට ලක්විය.
එහිදී එම ගුවන් යානයේ ගුවන් නියමු නිළධාරීන් දෙදෙනා ගුවන් යානයෙන් ආරක්ෂිතව ඉවත්ව කුරුණෑගල පාදෙණිය මිනුවන්ගැටේ ගැටේ විද්‍යාලය පරිශ්‍රයට පැරිෂුට් ආධාරයෙන් ගොඩ බැස තිබේ.
මෙම ගුවන් යානයේ ප්‍රධාන පුහුණු උපදේශක ගුවන් නියමුවරයා හා පුහුණු ගුවන් නියමු නිළධාරිවරයා ගමන් කර ඇති අතර, එම නිළධාරින් මේ වනවිට කුරුණෑගල ජාතික රෝහලට ඇතුලත් කර ඇත.
මෙම ගුවන් යානය ගුවන් හමුදා කටුනායක මුලික කදවුරෙන් පෙ.ව. 7.27ට පමණ ගුවන්ගතවී ඇති බවත් පෙ.ව. 7.55ට පමණ මෙම අනතුර සිදුවී ඇති බවත් ගුවන් හමුදාව පවසයි.
