අහුංගල්ල ත්‍රීරෝද රථ සංගමයේ සභාපතිට වෙඩි
අහුංගල්ල නගරයේ දී අද (09) අලුයම සිදුවූ වෙඩි තැබීමකින් පුද්ගලයකු බරපතල තුවාල ලබා රෝහල් ගත කළ බව අහුංගල්ල පොලීසිය පැවසීය.
මෙසේ වෙඩි වැදීමෙන් තුවාල ලබා ඇත්තේ, අහුංගල්ල ත්‍රීරෝද රථ සංගමයේ සභාපති ඩබ්ලිව්. නන්දසිරි ද සිල්වා නමැති අයෙකු බවයි, පොලීසිය පැවසුවේ.
ඔහු අහුංගල්ල – බෝගහපිටිය ප්‍රදේශයේ පදිංචිකරුවෙක්.
පොලීසිය පැවසුවේ, අද (09) උදෑසන 6.15ට පමණ රතු පැහැති ස්කූටි වර්ගයේ යතුරුපැදියකින් පැමිණි නාඳුනන තුවක්කුකරුවන් දෙදෙනෙකු විසින් වෙඩිතැබීම සිදුකර පළාගොස් ඇති බවයි.
වෙඩි වැදීමෙන් තුවාල ලැබු පුද්ගලයා බලපිටිය මූලික රෝහලට ඇතුළත් කර තිබේ.
තුවාල ලැබු පුද්ගලයා “ලොකු පැටී” නමැති අපරාධ කල්ලි සාමාජිකයාගේ ඥාතියෙකු වන බව ද සඳහන්.
සිද්ධිය සම්බන්ධයෙන් අහුංගල්ල පොලීසිය වැඩිදුර විමර්ශන ආරම්භ කර තිබේ.