අවුරුද්දට ගමේ යන අයට විශේෂ ප්‍රවාහන සේවා
එළඹෙන සිංහල දෙමළ අලුත් අවුරුද්ද සැමරීමට ගම්බිම් බලා යන ජනතාවට විශේෂ ප්‍රවාහන සේවා ලබන 08 වැනිදා සිට ක්‍රියාත්මක බව ප්‍රවාහන බලධාරීන් පවසයි.
ඒ අනුව, ඒ සඳහා අතිරේක බස් රථ 500ක් යොදා ගන්නා බවයි, ශ්‍රි ලංකා ගමනාගමන මණ්ඩලයේ සභාපති ජීවක ප්‍රසන්න මහතා සඳහන් කළේ.
එමෙන්ම, කොළඹ, කොටුව මධ්‍යම බස් නැවතුම්පොළේ සිට අතිරේක බස් ගමන් වාර ධාවනයට එක් කරන බව ද ඔහු ප්‍රකාශ කළේය.
උත්සව සමයේ විශේෂ ප්‍රවාහන සේවා ලබන 20 වැනිදා දක්වා ක්‍රියාත්මක බවද සභාපතිවරයා පැවසීය.
මේ අතර, ගම්බිම් බලා යන ජනතාවට ලබන 10 වැනිදා සිට අතිරේක දුම්රිය ගමන් වාර 40ක් පමණ ධාවනයට එක් කරන බව දුම්රිය දෙපාර්තමේන්තුව ප්‍රකාශ කළේය.
කොළඹ, කොටුව දුම්රිය ස්ථානයේ සිට බදුල්ල , බෙලිඅත්ත, ත්‍රිකුණාමලය, අනුරාධපුරය ඇතුළු ගමනාන්ත කිහිපයක් සඳහා එම දුම්රිය ගමන් වාර යොදවනු ඇත.
මේ අතර පෞද්ගලික බස් සේවා ද උත්සව සමය වෙනුවෙන් ගම්බිම් බලා යන ජනතාවට විශේෂ ප්‍රවාහන සේවා සංවිධාන කර තිබේ.
