පාස්කු ප්‍රහාරයට චෝදනා ලැබූ සාක්ෂිකාරිනියක් නොදන්වා රට ගිහින්
පාස්කු ඉරුදින ත්‍රස්ත ප්‍රහාරය එල්ල කළ මරාගෙන මැරෙන බෝම්බකරුවන් දෙදෙනෙකු පිළිබඳ තොරතුරු ආරක්ෂක අංශ වලට වසන් කළේ යැයි චෝදනා ලබා සිටින දෙමටගොඩ, මහවිල උද්‍යානයේ පදිංචි කෝටිපති ව්‍යාපාරික මොහොමඩ් ඊබ්‍රාහීම්ට එරෙහිව නීතිපතිවරයා විසින් ගොනුකර තිබෙන නඩුවේ විභාගය ජූලි මස 02 වනදා දක්වා කල් තැබීමට කොළඹ මහාධිකරණය නියම කළා.
එම නඩුවේ පැමිණිල්ලේ දෙවැනි සාක්ෂිකාරිණිය ලෙස නම්කර තිබූ කෝටිපති ව්‍යාපාරික මොහොමඩ් ඊබ්‍රාහීම්ගේ නිවසේ ගෘහ සේවිකාව ලෙස සේවය කළ තැනැත්තිය අපරාධ පරීක්ෂණ දෙපාර්තමේන්තුවට හෝ නීතිපති දෙපාර්තමේන්තුවට හෝ නොදන්වා විදෙස් රැකියාවකට ගොස් ඇති බවත්, සිව්වැනි පැමිණිලිකාරිණිය ද විදෙස්ගත වීමේ අවදානමක් පවතින බවත් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණී ගිරිහාගම මහත්මිය අධිකරණයට කරුණු දක්වමින් දක්වා තිබේ.
ඒ අනුව පෙර කී දෙවැනි සාක්ෂිකාරිණිය විදෙස්ගත වීමට අදාළ ව ආගමන – විගමන දෙපාර්තමෙන්තුවෙන් ලබාගත් ලේඛන අද දිනය තුළ වහාම අධිකරණයට ඉදිරිපත් කරන ලෙසට අපරාධ පරීක්ෂණ දෙපාර්තමේන්තුවට විනිසුරු මාරසිංහ මහතා නියෝග කළා.
එම සැකකාරිණිය විදෙස්ගත වී ඇති බව අපරාධ පරීක්ෂණ දෙපාර්තමේන්තුවේ නිලධාරීන් විසින් අධිකරණයට මින් පෙර දැනුම්දීමට කටයුතු කිරීමට තිබූ බවත්, අහසින් කඩා වැටුණු පිරිසක් මෙන් අධිකරණය හමුවට නොපැමිණෙන ලෙසත් නඩුවට අදාළ කටයුතු නිසි ක්‍රම වේදයට අනුව සිදු කරන ලෙසත් මාරසිංහ මහතා අපරාධ පරීක්ෂණ දෙපාර්තමේන්තුවේ නිලධාරීන්ට දැඩිව අවවාද කර සිටියා.
සහරාන් හෂීම් ප්‍රමුඛ පාස්කු බෝම්බකරුවන් මරාගෙන මැරෙන බෝම්බ ප්‍රහාරයක් එල්ල කරන බවට ලැබුණු තොරතුරු තිබියදීත් ඒ බව පොලිසියට නොදන්වා කරුණු වසන් කිරීමෙන් ත්‍රස්තවාදය වැළැක්වීමේ පනත යටතේ ගැනෙන වැරදි සිදු කර ඇති බවට චෝදනා කර මොහොමඩ් ඊබ්‍රහීම් ඇතුළු ඔහුගේ පුතුන් දෙදෙනකුට නීතිපති නඩු පවරා තිබුණා.
එම නඩුවේ පළමු විත්තිකරු ලෙස සැලකෙන මොහොමඩ් ඊ බ්‍රහීම් අද අධිකරණය හමුවේ රෝද පුටුවක ආධාරයෙන් පෙනී සිටියා.
කෙසේ නමුත් නඩු විභාගයට පෙනී සිටීමට තරම් සුදුසුම් මට්ටමක එම විත්තිකරු නොසිටින බව ඔහු වෙනුවෙන් පෙනී සිටි ජනාධිපති නීතිඥ අනූජ ප්‍රේමරත්න මහතා අධිකරණය හමුවේ පෙන්වා දුන් අතර ඊට කිසිදු විරුද්ධත්වයක් නියෝජ්‍ය සොලිසිටර් ජනරාල්වරිය නොපෑම හේතුවෙන් නඩුව කල් තැබීමට අධිකරණය නියෝග කළා.
