සැඟව සිටි දේශබන්ධු අධිකරණය හමුවට
2023 වසරේ මාතර, වැලිගම ප්‍රදේශයේ සිදුවු වෙඩිතැබීමට අදාළව වරෙන්තු ලබා සිටි හිටපු පොලිස්පති දේශබන්ධු තෙන්නකෝන් මහතා මීට සුළු මොහොතකට පෙර මාතර අධිකරණයට පැමිණි බව වාර්තා වේ.
නීතිඥවරයෙකු මාර්ගයෙන් ඔහු අධිකරණය වෙත මෙලෙස ඉදිරිපත් වී ඇති බවයි වාර්තා වන්නේ.
අදාළ සිද්ධිය සම්බන්ධයෙන් මාතර මහෙස්ත්‍රාත් අධිකරණය ලබාදුන් නියෝගය ක්‍රියාත්මක කිරීම වළක්වාලමින් අතුරු තහනම් නියෝගයක් නිකුත් කරන්නැයි ඉල්ලා දේශබන්දු තෙන්නකෝන් මහතා ඉදිරිපත් කළ රිට් පෙත්සම විභාගයට නොගෙනම නිෂ්ප්‍රභ කිරීමට අභියාචනාධිකරණය පෙරේදා තීන්දු කළේය.
ඒ අනුව දේශබන්දු තෙන්නකෝන් මහතා වහාම අත්අඩංගුවට ගෙන අධිකරණයට ඉදිරිපත් කිරීමට පියවර ගන්නා ලෙස අභියාචනාධිකරණ විනිසුරු මඩුල්ල විසින් අපරාධ පරීක්ෂණ දෙපාර්තමේන්තුවට නියෝග කළේය.
දේශබන්දු තෙන්නකෝන් මහතා මේ වනවිට අධිකරණ සංකීර්ණයේ අසුන්ගෙන සිටින අතර ඔහුගේ නඩුව අද දහවල් 02ට විභාගයට ගැනීමට නියමිතව තිබේ.
ඒ අනුව දේශබන්දු මහතා වෙනුවෙන් පෙනී සිටීමට කොළඹ සිට ජනාධිපති නීතිඥවරු ඇතුළු ජ්‍යේෂ්ඨ නීතිඥවරුන් 50කට ආසන්න සංඛ්‍යාවක් මේ වන විට මාතර මහේස්ත්‍රාත් අධිකරණය වෙත පැමිණ ඇති බවයි වාර්තා වන්නේ.
