රුපියල් කෝටි 09 කට වඩා වටිනා කොකේන් සමග විදෙස් ජාතිකයෙක් අත්අඩංගුවට
රුපියල් නව කෝටි හැත්තෑ ලක්ෂයක් වටිනා කොකේන් මත්ද්‍රව්‍ය තොගයක්, සිය ගමන් මල්ලේ සගවා ගෙන කටුනායක ගුවන් තොටුපොළේ ”හරිත මාවත” ඔස්සේ පිට වී යාමට තැත් කළ විදේශිකයෙකු ගුවන් තොටුපොළ පැමිණීමේ පර්යන්තයේ දී රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අද (08) අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ, 66 හැවිරිදි බොස්නියානු ජාතිකයෙක්.
ඔහු සිය ගමන් මල්ලේ, පාද පිරිසිදු කිරීමට යොදා ගන්නා, බ්‍රස් 114 ක් තුළ, කොකේන් මත්ද්‍රව්‍ය කිලෝ ග්‍රෑම් 02 යි ග්‍රෑම් 759 ක්, සූක්ෂම ලෙස සගවා ගෙන පැමිණ තිබුණි.
සැකකාර විදෙස් ජාතිකයා මෙම මත්ද්‍රව්‍ය තොගය රැගෙන කොලොම්බියාවෙන් ගමන් ආරම්භ කර කටාර් රාජ්‍යයේ දෝහා වෙත පැමිණ තිබේ.
ඉන්පසුව ඔහු එතැන් සිට අද අලුයම 02.40ට කටාර් ගුවන් සේවයේ කිව්.ආර්-662 දරන ගුවන් යානයෙන් කටුනායක ගුවන්තොටුපොළ වෙත පැමිණ තිබුණි.
මෙසේ අත්අඩංගුවට ගත් මෙම බොස්නියා ජාතිකයා සමග ඔහු විසින් රැගෙන ආ කොකේන් මත්ද්‍රව්‍ය තොගය වැඩිදුර විමර්ශන කටයුතු සදහා කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබේ.