ශ්‍රී ලංකාවට විශිෂ්ට ජයක්

සංචාරක ශ්‍රී ලංකා කණ්ඩායම හා නවසීලන්ත කණ්ඩායම අතර අද පැවති අවසන් විස්සයි විස්ස තරගය ලකුණු 07කින් ජය ගැනීමට ශ්‍රී ලංකා කණ්ඩායම සමත් විය.

තරගයේ පළමුවෙන් පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 20 අවසානයේ කඩුළු 05ක් දැවී ලකුණු 218ක් රැස් කළේය.

ශ්‍රී ලංකා කණ්ඩායම වෙනුවෙන් පැතුම් නිස්සංක ලකුණු 14ක්ද, කුසල් මෙන්ඩිස් ලකුණු 22ක්ද, අවිශ්ක ප්‍රනාන්දු ලකුණු 17ක්ද, නායක චරිත් අසලංක ලකුණු 46ක්ද, රැස් කළේය.

වේගවත් ඉනිමක් ක්‍රීඩාකල කුසල් ජනිත් පෙරේරා පන්දු 46කදී ලකුණු 101ක් රැස් කිරීමට සමත් වූ අතර එය පන්දුවාර 20 තරගයකදී මෙරට ක්‍රීඩකයෙකු ලබා ගත් තෙවැනි ශතකය විය.

ලකුණු 219 ක ජයග්‍රාහී ඉලක්කයක් හඹා ගිය නවසීලන්ත පිලට සිය පන්දුවාර 20 අවසානයේ දී ලබා ගැනීමට හැකිවූයේ කඩුලු 7ක් දැවී ලකුණු 211 ක් පමණි.

පන්දු යැවීමේදී ශ්‍රී ලංකා කණ්ඩායමේ චරිත් අසලංක කඩුළු 03ක්ද, වනිඳු හසරංග කඩුළු 02ක්ද, බිනුර ප්‍රනාන්දු සහ නුවන් තුෂාර එක් කඩුල්ල බැගින්ද දවා ගත්තේය.