යම් කඩාකප්පල්කාරී දෙයක් වුණොත් ඒ ඡන්ද මධ්‍යස්ථානය ශූන්‍ය කිරීමට කටයුතු කරනවා
ඡන්ද මධ්‍යස්ථානයක යම් කඩාකප්පල්කාරී ක්‍රියාවක් සිදු වුවහොත් එහි ඡන්දය ශූන්‍ය කිරීමට කටයුතු කරන බව මැතිවරණ කොමිෂන් සභාවේ සභාපති ආර්.එම්.ඒ.එල්. රත්නායක මහතා පැවසීය.
අදාළ ඡන්ද ස්ථානාධිපතිවරයාගේ වාර්තාව අනුව ඒ කටයුතු සිදු කරන ඔහු රජයේ ප්‍රවෘත්ති දෙපාර්තමේන්තුවේ ඊයේ (19) පැවැති විශේෂ මාධ්‍ය හමුවකට එක්වෙමින් පැවසීය.
එහිදී වැඩිදුරටත් අදහස් පළ කරමින් ඒ මහතා මෙසේද පැවසීය.
එය සමස්ත ඡන්ද ප්‍රතිශතයට බලපානු ලබන්නේ නම් ඒ ශූන්‍ය කළ මධ්‍යස්ථානවල ඡන්ද ප්‍රතිඵලය නැවත ඡන්ද විමසීමක් පවත්වා අවසන් කරන තුරු සමස්ත ඡන්ද ප්‍රතිඵලය ප්‍රකාශයට පත් කරන්නේනෑ.
ඒ නිසා ඡන්ද මධ්‍යස්ථානවල අනවශ්‍ය ලෙස ගැවසීමෙන්, ඡන්දය කඩාකප්පල් කිරීමේ ක්‍රියාවල යෙදීමෙන් වැළකී සිටින ලෙස දන්වා සිටිනවා.
සාමය ආරක්ෂා කිරීමට පොලිසිය සහ ත්‍රිවිධ හමුදාව විසින් විවිධ පියවර ගනු ලබනවා.
21 වැනිදා ඡන්ද මධ්‍යස්ථානවලින් ඡන්ද පෙට්ටි ලැබීමෙන් අනතුරුව නිලධාරින් හා අනෙකුත් අවශ්‍යතා සම්පූර්ණ වූ පසු ප.ව. 7.ට පමණ දිස්ත්‍රික්කවල ඒ ඒ ගණන් කිරීමේ මධ්‍යස්ථානවල ගණන් කිරීම ආරම්භ වෙනවා.
තැපැල් ඡන්ද ගණන් කිරීම ප.ව. 4.15ට පමණ ආරම්භ කිරීමට දැනට කටයුතු කරලා තිබෙනවා.