විශ්වවිද්‍යාල සිසුන් රැගත් බස් රථයක් බදුල්ලේදී දරුණු අනතුරක – සිසුවියන් දෙදෙනෙකු මරුට
විශ්වවිද්‍යාල සිසුන් පිරිසක් ගමන් ගත් බස් රථයක් අද (01) බදුල්ල මහියංගන ප්‍රධාන මාර්ගයේ දුන්හිඳ අබගහඔය 5 කණුව ප්‍රදේශයේ දී වේල්ලක හැපී පෙරළී ගොස් සිදුවූ අනතුරකින් සිසුවියන් දෙදෙනෙකු ජීවිතක්ෂයට පත්ව තිබේ.
අනතුරෙන් තුවාල ලැබූ තවත් සිසු සිසුවියන් 41 දෙනෙකු බදුල්ල මහ රෝහලට ඇතුළත් කර ඇති අතර ඉන් කිහිප දෙනෙකුගේ තත්ත්වය බරපතල බවයි, බදුල්ල ශික්ෂණ රෝහලේ නියෝජ්‍ය අධ්‍යක්ෂ වෛද්‍ය ගයාන් කුරේ කියා සිටියේ.
මෙලෙස අනතුරට ලක්ව ඇත්තේ, කොතලාවල ආරක්ෂක විශ්වවිද්‍යාලයේ දක්ෂිණ මණ්ඩපයේ සිසුන් පිරිසක් රැගත් බස්රථයක් බව පොලීසිය පවසයි.
මෙම සිසුන් රැගත් බස්රථය පස්සර පැල්ගහතැන්න ප්‍රදේශයේ සිට රන්දෙණිගල බලා ධාවනය වෙමින් තිබියදී මෙසේ අනතුරට පත්ව ඇතැයි පොලිසිය සදහන් කළේය.
මේ වනවිටත් බදුල්ල පොලිසියේ නිලධාරීන් බදුල්ල මහ නගර සභා ගිනිනිවිම් ඒකකයේ නිලධාරීන් එක්වී බස්රථය තුළ සිරවී සිටින තුවාලකරුවන් ඉවතට ගැනීමේ මෙහෙයුම් කටයුතු සිදු කරමින් පවතී.
