අකුණු සැර වැදී නංගි මරුට අයියාට බරපතලයි
පස්සර අඹතැන්න ගම්මානයේ පැල්පත් නිවසක් අසළ භුමියක ගෙපලක් කපමින් සිටියදී අකුණු සැර වැදීමෙන් පාසල් සිසුවියක මියගොස් තවත් සිසුවෙකු බරපතල තුවාල ලබා තිබෙන බව පොලිසිය පවසයි.
මෙසේ මියගොස් ඇත්තේ, පස්සර මධ්‍ය මහ විදුහලේ 6 වන වසරේ ඉගෙනුම ලබමින් සිටි ඔබේසේකර මුදියන්සේලාගේ තිලක්ෂි මධුශිකා (11) නැමති සිසුවිය වන අතර ඇයගේ 16 හැවිරිදි වැඩිමහල් සහෝදරයා බරපතල තුවාල ලබා පස්සර දිසා රෝහලට ඇතුලත් කිරීමෙන් අනතුරුව බදුල්ල ශික්ෂණ රෝහල වෙත මාරුකර යවා තිබේ.
මියගිය සහ තුවාල ලැබූ එකම පවුලේ දරුවන් දෙදෙනා තම දෙමාපියන් දෙදෙනා සමග තම පැල්පත් නිවස වෙනුවට නව නිවසක් ඉදිකර ගැනීමට ගෙපලක් කැපීමට උදව් කරමින් සිටියදී වැහි අදුරත් සමග එක්වරම පතිත වූ අකුණු පහරක් වැදී ඇතැයි ද පොලිසිය සදහන් කළේය.
මින් මව පියා කිසිදු තුවාලයක් නොලබා බේරි ඇති බවත් පොලිසිය පැවසීය.
බදුල්ල දිසාව භාර නියෝජ්‍ය පොලිස්පති සුජිත් වෙදමුල්ල සහ ජේෂ්ඨ පොලිස් අධිකාරි වසන්ත කන්දේවත්ත යන මහත්වරුන්ගේ උපදෙස් මත පස්සර පොලිස්ය වැඩිදුර පරීක්ෂණ පවත්වති.