කෝටිපති ව්‍යාපාරිකයන් මැතිවරණ අපේක්ෂකයන්ට වියදම් කිරීමෙන් ඈත්වෙලා
ආර්ථික අර්බුදය හා දේශපාලනය සම්බන්ධයෙන් ඇති යම් යම් කලකිරීම්, පවතින දේශපාලන වටපිටාව තුළ පෙරලා ප්‍රතිලාභ ලබා ගත නොහැකියි යන සිතුවිල්ල මත කෝටිපති ව්‍යාපාරිකයන් ඇතුළු විවිධ දානපතීන් මැතිවරණ අපේක්ෂකයන්ගේ ඡන්ද වැඩ වලට උදව් කිරීම සියයට 70කින් පමණ පහත බැස ඇතැයි පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා පවසයි.
මේ හේතුවෙන් බොහෝ අපේක්ෂකයන්ගේ ප්‍රචාරක කටයුතු ඇල්මැරුණු තත්වයක් දක්නට ලැබෙන බවද ඔහු සඳහන් කළේය.
විදේශ රටවල දානපතීන් අපේක්ෂකයන්ගේ ඡන්ද වැඩට උදව් කිරීමද බොහෝ සෙයින් අඩුවී ඇතැයි ආරංචි මාර්ග සඳහන් කරයි.
සාමාන්‍යයෙන් මීට පෙර මැතිවරණ වලදී ව්‍යාපාරිකයන් ඇතුළු ධනපතියෝ දහස් සංඛ්‍යාත පිරිසක් අපේක්ෂකයන්ගේ මැතිවරණ ප්‍රචාරක කටයුතු වලට වියපැහැදම් කරති.
මේ අතර අධික වියදම් හේතුවෙන් අපේක්ෂකයන් පෞද්ගලිකව මැතිවරණ ප්‍රචාරක කටයුතු වලට වියදම් කිරීමද හරි අඩකටත් වැඩි ප්‍රමාණයකින් අඩු කර ඇතැයි මැතිවරණ නිරීක්ෂණ සංවිධාන පෙන්වා දෙයි.
මේ තත්ත්වය මත ප්‍රචාරක දැන්වීම් සඳහා මුදල් වියදම් කිරීමද දෙගුණයකින් පමණ අඩුවී ඇතැයි පවසන රෝහණ හෙට්ටිආරච්චි මහතා බොහෝ අපේක්ෂකයන් සිය ප්‍රචාරක කටයුතු සඳහා සමාජ මාධ්‍ය යොදාගෙන ඇති බව පෙනී යන්නේ යැයිද සඳහන් කළේය.
වියදම් සීමා පැනවීමද ප්‍රචාරක දැන්වීම් සඳහා මුදල් වැය කිරීම අඩුවීමට තවත් එක් හේතුවක් බව දැනගන්නට තිබේ. අපේක්ෂකයන් ගෙයින් ගෙට ගොස් ප්‍රචාරක කටයුතු කිරීම වෙනදාට සාපේක්ෂව වැඩිවුණු තත්ත්වයක් පෙනෙන්නට ඇති බව නිරීක්ෂණ සංවිධාන සඳහන් කරයි.
මේ අතර මහ මැතිවරණයට ඉදිරිපත්ව සිටින අපේක්ෂකයන් 8000න් සෘජුව ප්‍රචාරක කටයුතුවලට යොමු වී සිටින්නේ 7000කට ආසන්න පිරිසක් පමණක් බව පෙනී යන්නේ යැයි මැතිවරණ කොමිෂන් සභාව පවසයි.