![අභියාචනාධිකරණ නියෝගය අනුව ඥාණසාර හිමි කොළඹ මහාධිකරණයෙන් ඇප මත මුදාහරී අභියාචනාධිකරණ නියෝගය අනුව ඥාණසාර හිමි කොළඹ මහාධිකරණයෙන් ඇප මත මුදාහරී](https://cdn.statically.io/img/newsi.lk/wp-content/uploads/2024/07/galagoda.jpg?quality=100&f=auto)
අභියාචනාධිකරණ නියෝගය අනුව ඥාණසාර හිමි කොළඹ මහාධිකරණයෙන් ඇප මත මුදාහරී
ඉස්ලාම් ආගමට අපහාසාත්මක වන ආකාරයේ ප්රකාශයක් සිදුකළේ යැයි වසර 04ක සිර දඬුවමක් ලබා සිටින බොදුබල සේනා සංවිධානයේ ලේකම් පූජ්ය ගලගොඩ අත්තේ ඥාණසාර හිමියන් අභියාචනාධිකරණය විසින් දුන් නියෝගයකට අනුව ඇප මත මුදාහරින ලෙස කොළඹ මහාධිකරණ විනිසුරු ආදිත්ය පටබැඳිගේ මහතා අද (22) නියෝග කළේය.
සිරදඬුවම් නියමවීමෙන් පසුව ඥාණසාර හිමියන් විසින් ඊට එරෙහිව අභියාචනාධිකරණය වෙත ඇපෑලක් ඉදිරිපත් කර තිබූ අතර එම ඇපෑල විභාග කොට අවසන් තීන්දුවක් ප්රකාශයට පත් කරන තුරු තමන් වහන්සේව ඇප මත මුදාහරින ලෙස ඉල්ලා ඥානසාර හිමියන් කළ ඇප ඉල්ලීමක් කොළඹ මහාධිකරණ විනිසුරු ආදිත්ය පටබැඳිගේ මහතා විසින් මෑතකදී ප්රතික්ෂේප කර තිබුණි.
එම මහාධිකරණ නියෝගයට අනුව ඥාණසාර හිමියන් විසින් ඉදිරිපත් කළ ප්රතිශෝධන පෙත්සමක් විභාග කළ අභියාචනාධිකරණය උන්වහන්සේ රුපියල් 50,000ක මුදල් ඇප සහ රුපියල් ලක්ෂ 05 ක් බැගින් වූ ශරීර ඇප දෙකක් මත මුදාහරින ලෙස පසුගියදා නියෝග කළේය.
ඊට අමතරව උන්වහන්සේගේ විදේශ ගමන් තහනම් කිරීමට නියෝග කළ අභියාචනා අධිකරණය ඒ බව ආගමන හා විගමන පාලකවරයාට දැනුම් දෙන ලෙසත් කොළඹ මහාධිකරණය වෙත නියෝග කර තිබුණි.
එම අභියාචනාධිකරණ නියෝගය පරිදි උන්වහන්සේ අද (22) කොළඹ මහාධිකරණ විනිසුරුවරයා විසින් ඇප මත මුදාහරිනු ලැබීය.
2016 වසරේ කූරගල විහාරස්ථානය පිළිබඳව කොළඹ පැවැති මාධ්ය හමුවක දී පළ කරන ලද අදහස්වලින් ඉස්ලාම් ආගමට අපහාසයක් සිදු කොට ආගමික සංහිඳියාවට බාධා සිදු කළේ යැයි එල්ල කෙරුණු චෝදනා දෙකකට වරදකරු කෙරුණු ඥාණසාර හිමියන්ට කොළඹ මහාධිකරණය විසින් ඉකුත් මාර්තු මස 30 වනදා බරපතළ වැඩ සහිත වසර හතරක සිර දඬුවම් නියම කර තිබුණි.