බස් ගාස්තු අඩුවීම අද මධ්‍යම රාත්‍රියේ සිට
බස් ගාස්තු අඩුවීම අද (30) මධ්‍යම රාත්‍රියේ සිට ක්‍රියාත්මක වන බව සමස්ත ලංකා පෞද්ගලික බස් හිමියන්ගේ සංගමය පවසයි.
එම සංගමයේ ලේකම් අංජන ප්‍රියංජිත් මහතා කියා සිටියේ, ජාතික බස් ගාස්තු ප්‍රතිපත්තියට අනුව එය ක්‍රියාත්මක වන බවයි.
ඒ අනුව, බස් ගාස්තු 5.27%කින් අඩුකරන බවත් ඒ හේතුවෙන් රුපියල් 30ක් වන අවම බස් ගාස්තුව රුපියල් 28ක් වෙන බවත් ඔහු සඳහන් කළේය.
මේ අතර ඉදිරියේ ඉන්ධන මිලේ අඩුවීමක් සිදුවුවහොත් එය කිසිසේත්ම බස් ගාස්තු අඩුවීමකට බලපෑමක් සිදුනොකරන බවට රජයත් සමඟ වූ එකඟතාවය මත මෙම 5%ක ගාස්තු අඩුවීම සිදුකළ බවයි, ලේකම්වරයා වැඩිදුටටත් සඳහන් කළේ.
“ආණ්ඩුව පිළිගත්තා මින් ඉදිරියට ඒ කියන්නේ අද (30) මධ්‍යම රාත්‍රියේදී සිදුවෙනවා නම් ඩීසල් මිලෙහි අඩුවීමක් මේ අඩුවීම කිසිසේත් බස් ගාස්තු අඩුවීමකට බලපෑමක් සිද්ධ කරන්නේ නෑ කියන එකඟතාවය මත මේ 5.27%ක බස් ගාස්තු අඩුවීමකට අපි එකඟ වන්නේ.
අපි පැහැදිලිව කියනවා ආණ්ඩුව විසින් යම් යම් චක්‍රලේඛ ගෙනල්ලා මේ ප්‍රවාන සේවාව අත්‍යවශ්‍ය සේවාවක් කරලා. අපේ වෘත්තීය ක්‍රියාමාර්ග පස්සට හකුළන්න ආණ්ඩුව උත්සාහ කරනවානම් අපි එයට කිසිසේත පසුබට වන්නේ නැහැ.”
“අපි ජනතාවගෙන් විශේෂ ඉල්ලමක් කරනවා. අද මධ්‍යම රාත්‍රීයේ සිට මේ බස් ගාස්තු අඩුවීමේ වාසිය 100%ක්ම මගී ජනතාව ලබාගන්න නම් අනිවාර්යෙන්ම මාරු සල්ලි රැගෙන එන්න.
නැත්නම් මොකද රුපියල් 30 තිබුණු බස් ගාස්තුව 28 දක්වා පරිවර්තනය වෙනවා එතකොට මේ රුපියල් දෙකේ ප්‍රශ්නයක් ඇතිවෙනවා. ඒ වගේම සෑම ගාස්තු අවස්ථාවකදීම මේ රුපියල් දෙක, තුන, පහ වගේ මාරු කාසි ගැටලුව ඇතිවෙන්න ඉඩ තියෙනවා.”