මිදිගම ඝාතනයට සැකකරුවන් 8ක් අත්අඩංගුවට
මිදිගම ගොවියාපාන ප්‍රදේශයේදී වෙඩි තැබීමේ සිද්ධියකට අදාළව සැකකරුවන් 08 දෙනෙකු මාතර කොට්ඨාස අපරාධ විමර්ශන කොට්ඨාසය විසින් අත්අඩංගුවට ගෙන තිබෙනවා.
පසුගිය සැප්තැම්බර් 19 වනදා සිදු වූ එම වෙඩි තැබීමෙන් පුද්ගලයෙකු ජීවිතක්ෂයට පත්ව තවත් පුද්ගලයන් දෙදෙනෙකු තුවාල ලැබුවා.
එම වෙඩි තැබීම සිදුකල සැකකරු, වෙඩි තැබීමට යොදාගත් ගිනි අවිය හා පතොරොම් ලඟ තබාගත් සැකකරුවෙකු, අපරාධයට ආධාර අනුබල දුන් තවත් සැකකරුවන් 05 දෙනෙකු සහ කාන්තාවක් එලෙස අත්අඩංගුවට ගෙන තිබෙනවා.
ඔවුන් වැල්ලවාය, අහංගම හා මිදිගම ප්‍රදේශවලදී අත්අඩංගුවට ගත් බවයි පොලිසිය පැවසුවේ.
එමෙන්ම අදාළ වෙඩි තැබීමෙන් අනතුරුව ගිනි අවිය ප්‍රවාහනය සඳහා යොදාගත් ත්‍රීරෝද රථය ද පොලිස් භාරයට ගෙන තිබෙනවා.
ගිනි අවිය සන්තකයේ තබාගෙන සිටි සැකකරු සන්තකයේ තිබී හෙරොයින් ජාවාරමෙන් උපයා ගත් බවට සැක කෙරෙන රුපියල් 15 ලක්ෂ 42,000 ක මුදලක් ද සිය භාරයට ගත් බවයි පොලිසිය පැවසුවේ.
ඔහු විදෙස් රටක සිට මෙරට සංවිධානාත්මක අපරාධ හා මත්ද්‍රව්‍ය ජාවාරම් සිදුකරනු ලබන පුද්ගලයෙකුගේ සමීපතමයෙකු බවට අනාවරණ වී තිබෙනවා.
අත්අඩංගුවට ගත් සැකකරුවන් මාතර පොලිස් ස්ථානය වෙත භාරදුන් බවයි මාතර කොට්ඨාස අපරාධ විමර්ශන කොට්ඨාසය පැවසුවේ.