හරක් කටාගේ ගෝලයෙක් කෝටි 22ක මත්ද්‍රව්‍ය සමඟ අත්අඩංගුවට
සංවිධානාත්මක අපරාධකරුවෙකු හා මහා පරිමාණ මත්ද්‍රව්‍ය ජාවාරම්කරුවෙකු වන නදුන් චින්තක වික්‍රමරත්න නොහොත් හරක් කටාගේ මත්ද්‍රව්‍ය ජාලයේ ප්‍රධාන ගෝලයා වන ආමි චූටි නැමැත්තාගේ මත්ද්‍රව්‍ය ජාලය මෙහෙයවනු ලබන පුද්ගලයෙකු රුපියල් කෝටි විසි දෙකකට ආසන්න වටිනාකමින් යුත් හෙරොයින් හා අයිස් මත්ද්‍රව්‍ය තොගයක් සමග අත්අඩංගුවට ගත් බව විශේෂ කාර්ය බලකාය පවසයි.
මෙසේ අත්අත්අඩංගුවට ගෙන ඇත්තේ, දෙහිවල ප්‍රදේශයේ පදිංචි (41) හැවිරිදි පුද්ගලයෙකු බව පොලිසිය පැවසීය.
සැකකරු සමග ලොරි රථයක් හා යතුරුපැදියක් පොලිස් භාරයට ගෙන තිබේ.
ශ්‍රී ලංකා යුද හමුදා බුද්ධි අංශයට ලද තොරතුරක් විශේෂ කාර්ය බලකායට දැන්වීමෙන් අනතුරුව එහි විශේෂ මෙහෙයුම් අංශ iii හි ස්ථානාධිපති පොලිස් පරීක්ෂක ආර්.ඒ.ඩී.ඒ. රණසිංහ මහතා ඇතුළු නිලධාරී කණ්ඩායමක් බොරලැස්ගමුව, 10 කණුව හංදිය ඉදිරිපිට මාර්ග සංඥා කුළුණ අසලදී වැටලීමක් සිදුකර තිබුණි.
එහිදී හෙරොයින් කිලෝ 06, ග්‍රෑම් 910 හා අයිස් මත්ද්‍රව්‍ය කිලෝ 01යි ග්‍රෑම් 17, ජංගම දුරකථනයක් සමග පුද්ගලයෙකු පොලිස් භාරයට ගැනීමට හැකි වූ අතර පසුව මත්ද්‍රව්‍ය ජාලය මෙහෙයවීම සඳහා භාවිතා කළ ලොරි රථයක් හා යතුරුපැදියක් පොලිස් භාරයට ගෙන තිබේ.