ඊශ්‍රායලයෙන් ඉරානයට ගුවන් ප්‍රහාර
ඉරානයේ තෝරාගත් හමුදා ඉලක්ක කිහිපයක් වෙත අද (26) අළුයම ගුවන් ප්‍රහාර එල්ලකළ බව ඊශ්‍රායල හමුදාව පවසයි.
ඉරානයේ ටෙහෙරාන් අගනුවර හමුදා ඉලක්ක වෙත මෙම ගුවන් ප්‍රහාර මාලාව එල්ල කරන බවත් ඉරානයේ න්‍යෂ්ටික හෝ තෙල් පිරිපහදු වෙත ප්‍රහාර එල්ල නොකරන බවත් ඊශ්‍රායලය ප්‍රහාර මාලාව ආරම්භ කිරීමට පෙර නිවේදනයක් නිකුත් කරමින් සඳහන් කර තිබේ.
පළමු ප්‍රහාරයෙන් ටෙහෙරානයේ ස්ථාන 7 ක පමණ පිපිරීම් සිදුව ඇතැයි ඉරාන මාධ්‍ය ප්‍රකාශ කළේය.
ප්‍රහාරයට පැමිණි ඇතැම් ඩ්‍රෝන යානා සහ එල්ල කළ මිසයිල ඉරාන ගුවන් ආරක්ෂණ පද්ධතිය විනාශ කර දැමූ බවද ඉරාන මාධ්‍ය පැවැසුවේය.
කෙසේ වෙතත් නැවත වරක් ඉරානයට මීට සුළු මොහොතකට පෙර ගුවන් ප්‍රහාරයක් එල්ල වූ අතර ඒ හේතුවෙන් ඉරාන ගුවන් සීමාව වසා දැමීමට බලධාරීහු කටයුතු කර තිබේ.
ඊශ්‍රායලය ඉරානයට එල්ල කරන ගුවන් ප්‍රහාර තවත් පැය කීපයක් පුරා සිදුවනු ඇති බවත් ඉරානයද ඊශ්‍රායලයට නැවත පිළිතුරු දීමට සූදානම් වන බවත් ආරංචි මාර්ග උපුටා දක්වමින් විදෙස් මාධ්‍ය වාර්තා කළේය.
තවමත් නිල වශයෙන් ප්‍රහාරවලින් සිදුවූ හානිය පිළිබඳව ඉරාන රජය නිවේදනයක් කර නොමැති බවද පැවැසෙයි.
කෙසේ වෙතත් ඊශ්‍රායලයේ ප්‍රති ප්‍රහාරයට ඇමෙරිකාව සම්බන්ධ නොවන බවට ඇමෙරිකානු ජනපති ජෝ බයිඩන් මාධ්‍ය වෙත ප්‍රකාශයක් නිකුත් කරමින් සඳහන් කළේය.
ඊශ්‍රායලයේ ප්‍රතිප්‍රහාරයත් සමග කලාපීය යුද්ධයක් ඇතිවීමේ අවදානම තවත් ඉහළ ගොස් ඇති බව විදෙස් මාධ්‍ය වාර්තා කළේය.